Xitoy avtomobil ishlab chiqaruvchilari tez sur’atlar bilan elektr va gibrid avtomobillarini Yevropaga eksport qilishni oshirmoqda. Bu haqda “Kommersant” xabar berdi.
Ma’lumotlarga ko‘ra, ikki yil ichida mamlakat Yevropa elektromobil bozorining 18 foiz ulushini egallashi mumkin.
Hafta boshida dunyodagi ikkinchi yirik elektromobil ishlab chiqaruvchisi Xitoyning BYD kompaniyasi Yevropada birdaniga uchta elektr modelini sotilishini e’lon qildi.
Yaponiyaning Nikkei agentligi ma’lumotlariga ko‘ra, Xitoyning yana uchta yirik ishlab chiqaruvchisi Great Wall, Geyely va SAIC o‘zlarining bir qancha elektr va gibrid modellarini Yevropaning eng yirik avtomobil bozori — Germaniyaga olib chiqishni rejalashtirmoqda, bu esa yevropalik avtomobil ishlab chiqaruvchilarga bosim o‘tkazishi mumkin.
Yilning birinchi yarmida Yevropada elektromobillar savdosining ulushi 13 foizdan 11 foizga tushgan bo‘lsa, AQSH va Xitoyda ular o‘sib bormoqda.
Mutaxassislar buni elektromobillar sanoati Yevropa Ittifoqi ma’muriyati tomonidan yetarlicha qo‘llab-quvvatlanmayotgani bilan bog‘lamoqda, Amerika va Xitoy rasmiylari esa bu yordamni oshirmoqda.
Avvalroq Xitoyda Tesla sotuvi sentabr oyida rekord darajaga yetgani haqida xabar berilgandi.
Izoh (0)