“Pasternak” restorani Toshkent xalqaro aeroportining “steril” zonasida joylashgan Anor Business Lounge’da ovqatlanishni tashkil etish bo‘yicha tender g‘olibi bo‘ldi. Bu haqda Uzbekistan Airports matbuot xizmati xabar bermoqda.
Uzbekistan Airports boshqaruv kompaniyasi xalqaro va mahalliy brendlarni jalb qilish orqali aeroportlarning noaviatsion faoliyatini rivojlantirish siyosatini tanladi. Biz uchun biznes zalda xizmat ko‘rsatish uchun shaharda ko‘rsatilayotgan xizmat darajasini saqlab qoladigan nomdor restoranni tanlash muhim edi. Tender natijalariga ko‘ra, “Pasternak” restorani g‘olib deb topildi, — deyiladi matbuot xizmatining xabarida.
Biznes-zal jo‘nab ketayotgan va tranzit yo‘lovchilar uchun xizmat ko‘rsatadi. Anor Business Lounge’da bo‘lish narxi 350 ming so‘m.
Xizmat Wi-Fi tarmog‘idan foydalanish, dush va alohida hojatxona, samolyotga chiqish uchun individual taklifnoma, shuningdek, ovqatlanish, alkogolli va alkogolsiz ichimliklarni o‘z ichiga oladi.
Xizmat haqini chegara nazoratidan o‘tishdan oldin Toshkent aeroportining kassasida yoki steril zonada bo‘lganda, @UzairportsBot Telegram boti yordamida to‘lash mumkin.
Telegram boti orqali xizmatni xarid qilish uchun Toshkent aeroportini, keyin jo‘nab ketish terminalini va kerakli reysni tanlash kerak. Keyin bot familiya va ismni lotin tilida kiritishni “so‘raydi”.
Shundan so‘ng xizmat haqini Uzcard yoki Humo bank kartalari orqali to‘lash mumkin bo‘ladi. Yaqin kelajakda Uzbekistan Airports biznes-zal uchun boshqa to‘lov usullarini ham joriy qilishni rejalashtirmoqda.
Izoh (0)