Amerikalik biznesmen Ilon Mask Twitter’ni sotib olsa, kompaniya xodimlarining 75 foizini ishdan bo‘shatmoqchi. Bu haqda The Washington Post (WP) manbalar va korporativ hujjatlarga tayanib xabar bermoqda.
Qayd etilishicha, Mask bilan kelishuv amalga oshmagan taqdirda ham Twitter’da keng ko‘lamli ishdan olishlar bo‘lishi kutilmoqda.
WP ma’lumotlariga ko‘ra, Twitter 7 500 xodimga ega. Agar Ilon Maskning rejasi amalga oshsa, u holda kompaniyada 2 mingga yaqin xodim ishlaydi.
Ammo kelishuv muvaffaqiyatsizlikka uchragan taqdirda ham, Twitter’ning hozirgi rahbariyati kelasi yil oxirigacha ish haqi fondini taxminan 800 million dollarga qisqartirishni rejalashtirgan.
Bu xodimlarning deyarli to‘rtdan bir qismini ishdan bo‘shatishini anglatadi. Kompaniya, shuningdek, infratuzilmasini, jumladan, ma’lumot markazlarini qisqartirish niyatida.
Maskning Twitter’ni sotib olish rejalari aprel oyida ommaga ma’lum bo‘lgandi, biroq u iyul oyida taklifni qaytarib oldi.
Bitim to‘xtatilgani sababli Twitter biznesmen ustidan sudga murojaat qilgan. Oktyabr oyida Ilon Mask ijtimoiy tarmoqni sotib olish bo‘yicha kelishuvni yakunlashga qaror qildi. Sud unga 28-oktabrgacha vaqt berdi.
Avvalroq Ilon Mask Tesla kapitallashuvi Apple va Saudi Aramco kompaniyalarining umumiysidan oshib ketishini aytgandi.
Izoh (0)