Россиялик депутат аёлларни ҳам муддатли ҳарбий хизматга чақиришни бошлашни таклиф қилди

Россия Давлат думаси депутати Алексей Чепа россиялик аёллар муддатли ҳарбий хизматга чақирилиши кераклигини айтди, деб ёзади «Ura.ru».

Армияга муддатли хизмат учун чақирилиш россиялик аёлларга нисбатан ҳам амал қилиши керак, деди Давлат думасининг «Адолатли Россия — ватанпарварлар — Ҳақиқат учун» партиясидан депутати Алексей Чепа «Ura.ru»га берган интервьюсида.

«Худди Исроилдагидек бошлашни таклиф қиламан. Шунингдек, ҳамма аёлларни ҳам», — деди Чепа Федерация кенгаши Владимир Жабаровнинг муддатли ҳарбий хизматчиларни тайёрлаш давомийлигини икки йилгача ошириш таклифини қўллаб-қувватлар экан.

Депутат аниқлик киритишича, армияда бир йил хизмат ўташ ҳарбийларга ҳам, Мудофаа вазирлигига ҳам кам фойда келтиради, чунки бундай муддатда одамни ҳарбий мутахассисликка ўргатиш қийин.

Депутатнинг сўзларига кўра, айни пайтда мамлакатда қўлидан ҳеч нарса келмайдиган муддатли ҳарбий хизматчилар кўп сонли. Шу билан бирга, Чепа қайд этишича, шартнома асосидаги ҳарбий хизматга ўтиш концепцияси ушбу соҳани ривожлантиришда тўғри йўналиш бўлган бўларди, бироқ унга ўтиш «инқилобий эмас, силлиқ» нўлиши керак.

Аввалроқ Федерация кенгашининг халқаро масалалар бўйича қўмитаси раисининг биринчи ўринбосари Владимир Жабаров армияда икки йиллик хизматга қайтиш ҳақида ўйлаб кўриш таклифини киритган эди. Унинг сўзларига кўра, бу Россия Қуролли кучлари таркибини кўпайтириб, ҳарбийларни тайёрлаш сифатини яхшилаши мумкин бўларди.

Бу ғояни Давлат думасининг мудофаа бўйича қўмитаси раҳбари ўринбосари Юрий Швиткин ҳам қўллаб-қувватлади. Бундан ташқари, у мактабларда бошланғич ҳарбий тайёргарлик курсларини киритиш ҳақида ўйлаб кўришга ҳам чақирди.