Россия армияси Украина ҳудудидаги энергетика объектларини ўққа тутишда давом этаётганини ҳисобга олиб, Украина ҳукумати инқироздан чиқиш йўли сифатида электр энергиясини импорт қилишни кўриб чиқмоқда. Бу ҳақда «Коммерсантъ» хабар бермоқда.
Мамлакат етказиб берувчилар билан музокаралар олиб бормоқда. Украина Энергетика вазирлиги маълумотларига кўра, барча энергетика инфратузилмасининг 30-40 фоизи Россия ҳужумларига учраган.
Бу жуда катта зарба. Сизга иссиқлик ишлаб чиқариш қувватининг камида ярми, балки ундан ҳам кўпроқ қисмига зарар етказилганини айта оламан. Бу ҳафта улар бир қатор иссиқлик электр станцияларига зарба беришди, — дейди Украина энергетика вазири Герман Галушченко Reuters агентлигига.
Унинг таъкидлашича, бу ҳафта ўққа тутилиши сабабли мамлакат 4000 МВт қувватни йўқотган.
Вазирнинг сўзларига кўра, Россия армияси ниҳоят уларни йўқ қилиш мақсадида бир қатор энергетика объектларини яна ўққа тутмоқда.
15 октябрь куни Украина президенти Владимир Зеленский маҳаллий ҳокимият органлари Россия қуролли кучларининг 10 октябрдан бошланган оммавий ўққа тутилиши оқибатида зарар кўрган 15 та энергетика объектини тиклаганини айтганди.
Россия армиясининг Украинада давом этаётган ҳужумлари натижасида энергетика объектларининг аксарияти ишдан чиққан, шу муносабат билан Украина расмийлари аҳолини электр энергиясини қатъий тежашга чақирмоқда.
Изоҳ (0)