Xitoylik muhandislar noyob loyihaga qo‘l urdi. Guizhou provinsiyasida tog‘ ikkiga bo‘linib, dunyodagi eng baland ko‘prik qurilishi boshlandi. Bu haqda The Independent xabar berdi.
Ta’kidlanishicha, Guizhou provinsiyasida quriladigan Huajiang ko‘prigi shu qadar baland bo‘ladiki, hatto Eyfel minorasi ham uning yonida hech narsa bo‘lmay qoladi. Loyiha doirasida soatlab vaqt oladigan tik tog‘ yo‘llari bir daqiqalik tekis yo‘lga qisqaradi.
Tog‘ nega ikkiga bo‘lindi?
Guizhou provinsiyasining 92 foizi tog‘ va jarliklardan iborat. Bu avtomobil harakati uchun juda katta noqulaylik tug‘diradi. Shu sababli muhandislar uzun tunnel qazish o‘rniga, butun tog‘ cho‘qqilarini kesib, uni ko‘prik avtomagistralga aylantirishga qaror qilgan. Muhandislarga ko‘ra, ko‘prik 625 metr balandlikda osilgan holatda quriladi. U qurib bitkazilgach dunyodagi eng baland ko‘prik bo‘lishi kutilmoqda.
Ko‘prikning o‘zi ham rekord darajada katta: uzunligi 2890 metrni tashkil etadi. Uning tayanch ustunlari ham boshni aylantiradigan darajada baland. Qurilishda 49 ming tonna po‘lat ishlatilmoqda. Jarayon GPS yordamida boshqariladigan kranlar va shamol sensorlari orqali nazorat qilinmoqda — bunday balandlikda hatto yengil shamol ham xavfli bo‘ladi.
Avval 70 daqiqa edi, endi — 1 daqiqa
Uzoq va xatarli 70 daqiqalik tog‘ yo‘li, endilikda bor-yo‘g‘i 1 daqiqa davom etadigan xavfsiz va zamonaviy sayohatga aylanmoqda. Bu esa tog‘lar bag‘ridagi qishloqlardan shaharga tezkor va qulay yo‘l bilan yetib olish imkonini beradi.
Ko‘prik 2025-yil oxirida foydalanishga topshirilishi rejalashtirilgan. U nafaqat transport tizimini soddalashtiradi, balki yangi turistik maskanga ham aylanishi mumkin. Loyiha doirasida hududda ekstremal sport turlari va hattoki yulduz kuzatuv nuqtalari ham ishga tushiriladi. Guizhou provinsiyasi allaqachon “dunyodagi eng baland ko‘priklar muzeyi” nomini olgan. Yangi Huajiang ko‘prigi esa bu “muzey”ning eng qimmatbaho eksponatiga aylanadi.
Izoh (0)