Indoneziya armiyasi Turkiyaning KHAN ITBM-600 ballistik raketa tizimini o‘z inventariga qabul qilib oldi. Bu haqda mudofaa sohasiga ixtisoslashgan Sahabat Keris platformasi Sharqiy Kalimantandagi harbiy bazada olingan suratlarga asoslanib xabar berdi.
Jakarta 2022-yil Roketsan kompaniyasi bilan bu bo‘yicha tegishli shartnoma imzolagan edi. Tatra 8×8 platformasiga asoslangan tizim o‘zining yuqori harakatchanligi bilan jangovar amaliyotlarni qisqa vaqt ichida bajarish imkonini beradi.
Ishlab chiqaruvchiga ko‘ra, KHAN tizimining jangovar radiusi 280 kilometrgacha bo‘lib, raqib nishonlariga yuqori aniqlikda zarba berishda qo‘llaniladi. Raketa GPS va uning ruscha muqobili GLONASS navigatsiya tizimlari yordamida ishlaydi.
KHAN Indoneziyaning uzoq masofaga zarba berish salohiyatini oshiradi. Mazkur qadam potensial tahdidlarga tezkor javob qaytarishga qaratilgan keng ko‘lamli modernizatsiya dasturining bir qismidir.
Ammo ikki davlat o‘rtasidagi hamkorlik bu bilan cheklanmaydi. Indoneziya Istanbulda o‘tgan IDEF2025 xalqaro ko‘rgazmasida Turkiyadan KAAN qiruvchi samolyotlarini sotib olish bo‘yicha kelishuvga erishdi. Taxminan 10 milliard dollarlik shartnoma doirasida turklar 48 ta havo borti yetkazib beradi.
Izoh (0)