Turkiya prezidenti Rajab Toyyib Erdo‘g‘on eng yaqin vaqtda Rossiya prezidenti Vladimir Putin va Ukraina prezidenti Vladimir Zelenskiy bilan telefon orqali muloqot qilishini aytdi, deb yozadi “RBK”.
Erdo‘g‘on Rossiya prezidenti bilan so‘nggi muloqoti yakunida Rossiya yetakchisining Ukraina bilan muzokaralar borasidagi pozitsiyasi yumshagani haqida taassurotga ega bo‘lgan.
“Janob Putin [Kiyev bilan] muzokaralarga oldingidan ko‘ra yumshoqroq va ochiqroq munosabatda bo‘layotganini ko‘rdim. Men ikkala yetakchi bilan ham eng yaqin kunlarda telefon orqali diplomatiya olib borib, ularni tinglab ko‘raman, bu qanday natija berarkan — ko‘ramiz”, — dedi Erdo‘g‘on.
Avvalroq Turkiya prezidenti Zelenskiy bilan telefon orqali suhbatlashgandi. “U bilan kechagi muloqotimiz chog‘ida u tomondan bunday to‘sqinlik yo‘qligini, u ham bu to‘siqni yengib o‘tish tarafdori ekanini his qildim”, — dedi u.
Turkiya Ukrainadagi ziddiyatni tartibga solishda o‘zini ko‘p bora vositachi sifatida taklif qilgan. Xususan, mart oxirida Istanbulda Anqaraning taklifiga ko‘ra, Rossiya va Ukraina delegatsiyalari uchrashuvi bo‘lib o‘tgandi. Bundan tashqari, Erdo‘g‘on Putin va Zelenskiy o‘rtasida ikki tomonlama uchrashuv tashkillashtirishni ko‘p marta taklif qilgan. Moskva bunday uchrashuv tinch yo‘l bilan tartibga solish bo‘yicha loyiha ishlab chiqilganidan keyingina o‘tkazilishi mumkin bo‘lishini ta’kidlagan.
30-sentabr kuni Kremlda Donetsk va Lugansk xalq respublikalari hamda Ukrainaning Xerson va Zaporojye viloyatlari bosib olingan qismlarining “Rossiya tarkibiga kirishi” haqida shartnomalar imzolandi. O‘sha kuniyoq Ukraina hukumati NATOga qo‘shilish uchun ariza berdi. Zelenskiy o‘shanda Rossiya bilan muloqotga tayyorligini aytgan, lekin “boshqa prezident bilan” degan edi.
4-oktabr kuni esa Ukraina rasman Putin bilan har qanday muzokaralardan bosh tortdi.
Avvalroq OAVda Turkiya rasmiylari Rossiya va yetakchi G‘arb davlatlari o‘rtasida Istanbulda muzokaralar tashkil etishga tayyorligi haqida xabarlar tarqalgan edi.
Shuningdek, 18-oktabr kuni Anqara Putin va Zelenskiyni uchrashtirishning hozircha hech qanday imkoni yo‘qligini bildirgani haqida xabar berilgan edi.
19-oktabr kuni Erdo‘g‘on Ukraina yetakchisi Vladimir Zelenskiy bilan telefon orqali muloqot qilib, uni mamlakatdagi mojaroni diplomatik usullar bilan hal qilishga chaqirgan va unga “har qanday sharoitda ham” muzokaralarga rozi bo‘lishni taklif qilgan edi.
Izoh (0)