“Svet”dan uzilgan Kiyev va Ukrainaning boshqa shaharlari, haligacha yerto‘lada yashayotgan limanliklar. Urushning 239-kunidan fotoreportaj
“Ukrenergo” kompaniyasi 10-oktabr kungi ommaviy otishma oqibatida shikastlangan elektr stansiyalarini ta’mirlash maqsadida butun mamlakat bo‘ylab tokni uzish boshlanganini e’lon qildi. Vladimir Zelenskiy Qrim ko‘prigidagi terakt buyurtmachisi Kiyev emasligini aytdi. Xarkov viloyati rahbari Oleg Sinegubov Ukraina Qurolli kuchlari mintaqadagi aholi punktlarini ozod qilishda davom etayotgani va hozirda viloyat hududining 1,8 foizi Rossiya ishg‘oli ostida qolayotganini ta’kidladi. Bundan tashqari, Rossiya Mudofaa vazirligi ma’lumotlariga ko‘ra, Ukraina Qurolli kuchlari Xerson, Lugansk va Donetsk viloyatlarida hujum uyushtirmoqda.
Vladimir Putin va Sergey Shoygu Ryazan viloyatidagi safarbar qilinganlar o‘qitilayotgan o‘quv markaziga tashrif buyurdi. Liz Trass Buyuk Britaniya bosh vaziri lavozimidan ketayotganini e’lon qildi — Britaniya Ukrainani urush boshlanganidan beri eng faol qo‘llab-quvvatlagan G‘arb davlatlaridan biri. Meduza urushning 239-kuniga oid asosiy fotosuratlar bilan bo‘lishdi.
Zaporojye viloyatida gumanitar yordam tarqatish
Mixaylo-Lukashevo qishlog‘i aholisi gumanitar yordam tarqatish punktida ko‘ngillilarga o‘z hujjatlarini ko‘rsatmoqda. Qishloq Zaporojyedan 40 kilometr sharqda joylashgan bo‘lib, u Zaporojye shahri kabi Ukraina Qurolli Kuchlari tomonidan nazorat qilinadi.Foto: AP Photo
Mixaylo-Lukashevoda odamlar gumanitar yordam qutilarini olmoqda.Foto: AP Photo
Mixaylo-Lukashevo aholisi gumanitar yordam solingan qutini velosipedga ortib ketmoqda.Foto: AP Photo
Ozod qilingan Limandagi hayot, uning yonida hamon janglar davom etmoqda
Limandagi uysiz qolgan oila — ularning kvartirasi Ukraina Qurolli kuchlari va bosqinchi kuchlar o‘rtasidagi janglarda vayron bo‘lgan. Ukraina qo‘shinlari 1-oktabr kuni Donetsk viloyatidagi Limanni ozod qildi. May oyining oxiridan beri shahar rus armiyasi tomonidan ishg‘ol qilingan.Foto: Getty Images
Uyining podvalida fonar yoqib yurgan kishi. Liman aholisi hali davom etayotgan janglar tufayli yerto‘lalarda va bombapanohlarda yashirinishga majbur bo‘lmoqda. Lugansk viloyati harbiy ma’muriyati rahbari Sergey Gaydayning so‘zlariga ko‘ra, Rossiya qo‘shinlari Limanga yangi hujum uyushtirishga harakat qilmoqda. Uning ta’kidlashicha, Rossiya safarbar qilingan askarlari va “Vagner” yollanma jangarilarini shaharga tortmoqda.Foto: Getty Images
Uyi yerto‘lasida turgan qizaloq. Shahar yaqinidagi doimiy janglar tufayli qizcha deyarli butun vaqtini onasi bilan yerto‘lada o‘tkazadi.Foto: Getty Images
Limandagi uylardan birining yerto‘lasida ovqat pishirayotgan ayol.Foto: Getty Images
Putin safarbar etilganlarni urushga tayyorlash markaziga tashrif buyurdi
Rossiya prezidenti Vladimir Putin mudofaa vaziri Sergey Shoygu va havo-desant qo‘shinlari qo‘mondoni o‘rinbosari Anatoliy Kontsev bilan birgalikda Ryazan viloyatidagi G‘arbiy harbiy okrugda safarbar qilinganlarning o‘quv markaziga tashrif buyurdi. Rossiyada “qisman safarbarlik” 21-sentabr kuni e’lon qilingan edi. Rossiya Mudofaa vazirligi 300 mingga yaqin odamni safarbar qilishni rejalashtirayotganini bildirgan. 19-oktabr kuni Rossiya prezidentining harbiy holat joriy qilish bo‘yicha farmoni imzolandi, unga ko‘ra Ukrainaning qo‘shib olingan hududlarida “to‘liq”, Rossiyaning qolgan qismida esa “qisman” harbiy holat joriy etildi.Foto: Rossiya Mudofaa vazirligi
Ukraina bo‘ylab rejalashtirilgan elektr energiyasi uzilishi
20-oktabr kuni bir necha soatga elektr energiyasidan uzilgan Kiyevning ko‘rinishi. Rossiyaning Ukraina energetika infratuzilmasiga hujumlari tufayli rasmiylar 20-oktabr kuni butun mamlakat bo‘ylab elektr energiyasini bir necha soatga uzishga qaror qildi. Shu kundan shaharlarda ko‘cha yoritgichlaridan foydalanish cheklandi. Energetika infratuzilmasining shikastlangan obyektlarini ta’mirlash ishlari davom etmoqda.Foto: Anadolu
Kiyev viloyati, Borodyanka qishlog‘ida yashovchi ayol rejali elektr ta’minoti uzilishi mobaynida telefoni bilan vaqt o‘tkazmoqda. Energetika vaziri maslahatchisi Aleksandr Xarchenkoning so‘zlariga ko‘ra, Rossiya hujumlari oqibatida Ukrainaning butun energetika infratuzilmasining qariyb 40 foizi jiddiy zarar ko‘rgan.Foto: Getty Images
Kiyevlik oila sham yorug‘ida kechki ovqatga hozirlik ko‘rmoqda.Foto: EPA
Rejalashtirilgan elektr ta’minoti uzilishi paytida Nikolayevning ko‘rinishi.Foto: Reuters
Borodyankada sham ko‘targan keksa yoshli ayol deraza yonida turibdi.Foto: AP Photo
Xarkovdagi elektr stansiyasida ta’mirlash ishlari
Xarkov elektr stansiyasi 10-oktabr kuni Rossiya armiyasi tomonidan kuchli o‘qqa tutildi. Ukraina rasmiylariga ko‘ra, mamlakatdagi elektr stansiyalarining 30 foizdan ortig‘i shikastlangan. Endilikda bu inshootlar qayta ta’mirlanib, fuqarolarni elektr energiyasini tejashga da’vat etilmoqda, energiya tizimini barqarorlashtirish maqsadida mamlakatda elektr energiyasini rejali o‘chirish ishlari olib borilmoqda.
Izoh (0)