AQSHning Missisipi shtatida bolalar bog‘chasining besh nafar sobiq xodimiga bolalarga shafqatsiz munosabatda bo‘lish ayblovi e’lon qilindi, deb xabar beradi New York Post. Avvalroq internetda xodimlar Scream (“Qichqiriq”) filmidagi niqoblarni kiyib, bolalarni qo‘rqitayotgani aks etgan video tarqalib, shov-shuvga sabab bo‘lgan edi.
Lil’ Blessings bolalar muassasasi ishchilari o‘zlarini “yomon” tutgan ba’zi bolalarni qo‘rqitib qo‘ymoqchi bo‘lgan, deb yozdi vaziyatdan xabardor odamlardan biri.
Xavotir uyg‘otuvchi ushbu videolavha Shtat Sog‘liqni saqlash departamenti va Monro okrugi sherifi idorasiga surishtiruv boshlashga turtki berdi, uning natijasida esa besh kishiga ayblovlar e’lon qilindi.
Xodimlarning to‘rt nafari bolalarga shafqatsiz munosabatda bo‘lish bo‘yicha uchtadan band bilan ayblanmoqda. Yana bir xodimga esa shafqatsiz munosabat haqida xabar bermaganlik va voyaga yetmagan shaxsga oddiy hujum ayblovi qo‘yilgan.
Bolalar bog‘chasining xo‘jayini Sheyla Sanders voqeadan xabar topishi bilan unga aloqador xodimlarni ishdan bo‘shatib yuborganini ma’lum qilgan. Uning aytishicha, bunday hodisa sentabrda ham qayd etilgan, ammo video ijtimoiy tarmoqlarda paydo bo‘lmagunicha, ulardan xabardor bo‘lmagan.
Bolalar bog‘chasi ishchilaridan biri aytishicha, ushbu xatti-harakat “yomon niyatda” qilinmagan.
“O‘qituvchilar mendan bu narsani qilasanmi yoki bolalarni itoat qilishga va tozalashga majburlash uchun niqobdan foydalansak bo‘ladimi, deb so‘ragandi. Men bolalarga nisbatan zo‘ravon emasman”, — dedi u. U bolalarni qo‘rqitish rejasini ishlab chiqqanini, lekin bu haqda Sandersni xabardor qila olmaganini qo‘shib qo‘ydi.
Izoh (0)