O‘zbekiston avtomobillarni sotishdan ko‘ra ko‘proq sotib olishda davom etayotgani ma’lum bo‘ldi

2022-yilning yanvar—sentabr oylarida O‘zbekiston 564,1 million dollarga teng bo‘lgan 22 447 ta yengil avtomobil import qilgan. Bu haqda “Daryo”ga Davlat statistika qo‘mitasi hisobotidan ma’lum bo‘ldi.

Natijada 9 oydan buyon avtomobillar importi o‘tgan yilning shu davriga nisbatan 4 430 taga oshgan.

Shu bilan birga, sentabr oyida mashina importi hajmi o‘tgan oyga nisbatan oshib, 52,5 million dollarga yetgan. Avgust oyida bu ko‘rsatkich 50,7 million dollarga, iyulda esa 65 million dollarga teng edi.

Taqqoslash uchun, yanvarda avtomobillar importi 65,7 mln, fevralda 58,8 mln, martda 64,8 mln, aprelda 91,1 mln, mayda 40,1 va iyunda 75,4 mln dollarni tashkil qilgan.

Yil boshidan beri O‘zbekiston avtomobil eksporti hajmi 247,8 mln dollarni tashkil etdi.

Shunday qilib, 9 oy yakuni bo‘yicha avtomobil importi eksportdan 316,3 million dollar — 2,3 martaga oshgan.

Shu tariqa O‘zbekiston avtomobillarni sotishdan ko‘ra ko‘proq sotib olishda davom etmoqda.