AQSH Rossiyaga “xavfli qurol” yetkazib berayotgan Eronga sanksiyalar bilan tahdid qildi

Eron Rossiyaga “xavfli qurollar”ni yetkazib berishiga yo‘l qo‘ymaslik uchun, AQSH unga qarshi sanksiyalarni kuchaytirishga tayyor, deyiladi Davlat departamenti xabarida.

Amerika diplomatik idorasida qayd etishlaricha, Rossiya Ukrainadagi nizolarda Eronda ishlab chiqarilgan uchuvchisiz uchar qurilmalarni qo‘llayotgani, Tehron esa tez orada bunday dronlardan yanada ko‘proq yetkazib berishi mumkinligi borasida AQSHda talaygina dalillar mavjud.

“Biz Rossiyaga xavfli qurol taqdim etilishiga yo‘l qo‘ymaslik uchun ittifoqdoshlarimiz va sheriklarimiz bilan ishlashga qat’iy qarorlimiz. Biz bu yetkazmalarga aloqador bo‘lganlarning barchasiga sanksiyalar va boshqa tegishli vositalarimizni hech qanday ikkilanishlarsiz qo‘llaymiz”, — deyiladi Davlat departamenti xabarida.

Rossiya rasmiylari Ukrainada “Orlan-10”, “Lanset”, “Inoxodets”, shuningdek, “Geran-2” uchuvchisiz uchar qurilmalari qo‘llanilayotganini rasman tasdiqlagan edi. Ularning oxirgisi, Amerika va Ukraina hukumatlari da’vo qilishicha, Eronning Shahed turidagi jangovar uchar qurilmasi versiyasidir. Vashington Eronning Rossiyaga bir necha yuztagacha dronlar, shu jumladan, Shahed-191 va Shahed-129 dronlarini yetkazib berish rejalari haqida axborotga ega ekanini AQSH yozdayoq ma’lum qilgandi.

Eron Tashqi ishlar vazirligi buni tasdiqlamagan va AQSHning ayblovlarini asossiz deb atagan edi. Rossiya prezidenti vakili Dmitriy Peskov esa bunday xabarlar — dezinformatsiya, degan edi. Prezident yordamchisi Yuriy Ushakov aytishicha, Putin iyul oyida Tehronga tashrifi chog‘ida uchuvchisiz uchar qurilmalar yetkazib berish masalasini muhokama qilmagan.

19-oktabr kuni Eronning BMTdagi doimiy vakili Amir Said Iravaniy Tehron Rossiyaga jangovar dronlar yetkazib berayotganini qat’iyan rad etishini yana bir bora ma’lum qildi. Uning so‘zlariga ko‘ra, siyosiy kun tartibini ilgari surish ortidan mamlakatlar “Eronga qarshi dezinformatsiya kampaniyasini ishga tushirishga intilayotgani” hafsalani pir qiladi.

Iravaniyning bayonoti AQSH, Buyuk Britaniya va Fransiya Birlashgan Millatlar Tashkiloti Xavfsizlik kengashining 19-oktabrda o‘tkazilgan yopiq majlisida Eronning Rossiyaga qurol yetkazib berishi masalasini ko‘targaniga javoban yangradi.