Amerika ma’muriyati G20 davlatlari rahbarlari sammitida AQSH va Rossiya prezidentlari Jo Bayden va Vladimir Putin uchrashib qolishiga yo‘l qo‘ymaslikka intilayotgani haqidagi xabarlar haqiqatga to‘g‘ri kelmaydi. Bu haqda Oq uy matbuot kotibi Karin Jan-Pyer brifing chog‘ida ma’lum qildi.
Avvalroq Politico gazetasi amerikalik mansabdorlarga tayanib, Oq uy ikki prezident umumiy fotosuratda birgalikda paydo bo‘lishiga va hatto yo‘lakda ham uchrashib qolishiga yo‘l qo‘ymaslikka intilayotgani haqida xabar bergandi. Rasmiylar shundoq ham Bayden va Putin yuzma-yuz uchrashishini istisno qilmoqda, biroq siyosatchilar bitta yalpi majlisga tushib qolishi mumkin, deya aniqlik kiritgan manbalar. Ularning so‘zlariga ko‘ra, Bayden ma’muriyatida Amerika prezidenti Putin bilan uchrashishi kerak emasligi bo‘yicha deyarli hamma bir yoqadan bosh chiqargan.
G20 sammiti 15—16-noyabr kunlari Indoneziyada o‘tkazilishi kerak. Indoneziya tashqi ishlar vaziri Retno Marsudi Rossiya va Ukraina prezidentlari sammitda qatnashishini ma’lum qildi.
Avvalroq AQSH prezidenti Jo Bayden G20 yetakchilarining navbatdagi yig‘ilishida Rossiya prezidenti Vladimir Putin bilan uchrashishni istisno qilmagan edi.
Rossiya tashqi ishlar vaziri Sergey Lavrov esa agar AQSH tomonidan taklif kiritilsa, Kreml G20 sammitida Rossiya va Amerika prezidentlarining uchrashish imkoniyatini ko‘rib chiqishga tayyorligini bildirdi.
Keyinroq Bayden Indoneziyadagi G20 sammitida Rossiya yetakchisi Vladimir Putin bilan uchrashishdan ma’no yo‘qligini aytdi. Baydenning so‘zlariga ko‘ra, uchrashuv haqidagi qaror Putin nima haqida gaplashmoqchi ekanligiga bog‘liq bo‘ladi. Masalan, agar Putin narkotiklar kontrabandasida ayblanayotgan basketbolchi Britni Grinerni ayirboshlashni muhokama qilmoqchi bo‘lsa, u suhbatga rozi bo‘ladi.
Ukraina prezidenti Vladimir Zelenskiy G7 mamlakatlari yetakchilarining onlayn uchrashuvida keskin nutq so‘zlab, G7 davlatlari rahbarlarini Rossiyaning amaldagi rahbari bilan hech qanday muloqot bo‘lishi mumkin emasligi borasidagi aniq haqiqatni tan olishga chaqirdi, chunki Rossiya rahbarining o‘zi Ukrainaning yillar davomida tinchlik muzokaralarini o‘tkazishga urinishlariga qaramay, muloqotni rad etgan.
G20 sammiti (eng rivojlangan va rivojlanayotgan iqtisodiyotiga ega mamlakatlar, jumladan, Yevropa Ittifoqi davlatlari, AQSH, Rossiya, Xitoy, Buyuk Britaniya, Braziliya, Saudiya Arabistoni va boshqalarni birlashtiradi) 15—16-noyabr kunlari Balida bo‘lib o‘tadi. Indoneziya aprel oyida G20 yetakchilariga taklif yuborgan. Ukraina assotsiatsiyaga a’zo bo‘lmasa-da, tadbirga prezident Vladimir Zelenskiy ham taklif etilgan.
Izoh (0)