Америка маъмурияти G20 давлатлари раҳбарлари саммитида АҚШ ва Россия президентлари Жо Байден ва Владимир Путин учрашиб қолишига йўл қўймасликка интилаётгани ҳақидаги хабарлар ҳақиқатга тўғри келмайди. Бу ҳақда Оқ уй матбуот котиби Карин Жан-Пьер брифинг чоғида маълум қилди.
Аввалроқ Politico газетаси америкалик мансабдорларга таяниб, Оқ уй икки президент умумий фотосуратда биргаликда пайдо бўлишига ва ҳатто йўлакда ҳам учрашиб қолишига йўл қўймасликка интилаётгани ҳақида хабар берганди. Расмийлар шундоқ ҳам Байден ва Путин юзма-юз учрашишини истисно қилмоқда, бироқ сиёсатчилар битта ялпи мажлисга тушиб қолиши мумкин, дея аниқлик киритган манбалар. Уларнинг сўзларига кўра, Байден маъмуриятида Америка президенти Путин билан учрашиши керак эмаслиги бўйича деярли ҳамма бир ёқадан бош чиқарган.
G20 саммити 15—16 ноябрь кунлари Индонезияда ўтказилиши керак. Индонезия ташқи ишлар вазири Ретно Марсуди Россия ва Украина президентлари саммитда қатнашишини маълум қилди.
Аввалроқ АҚШ президенти Жо Байден G20 етакчиларининг навбатдаги йиғилишида Россия президенти Владимир Путин билан учрашишни истисно қилмаган эди.
Россия ташқи ишлар вазири Сергей Лавров эса агар АҚШ томонидан таклиф киритилса, Кремль G20 саммитида Россия ва Америка президентларининг учрашиш имкониятини кўриб чиқишга тайёрлигини билдирди.
Кейинроқ Байден Индонезиядаги G20 саммитида Россия етакчиси Владимир Путин билан учрашишдан маъно йўқлигини айтди. Байденнинг сўзларига кўра, учрашув ҳақидаги қарор Путин нима ҳақида гаплашмоқчи эканлигига боғлиқ бўлади. Масалан, агар Путин наркотиклар контрабандасида айбланаётган баскетболчи Бритни Гринерни айирбошлашни муҳокама қилмоқчи бўлса, у суҳбатга рози бўлади.
Украина президенти Владимир Зеленский G7 мамлакатлари етакчиларининг онлайн учрашувида кескин нутқ сўзлаб, G7 давлатлари раҳбарларини Россиянинг амалдаги раҳбари билан ҳеч қандай мулоқот бўлиши мумкин эмаслиги борасидаги аниқ ҳақиқатни тан олишга чақирди, чунки Россия раҳбарининг ўзи Украинанинг йиллар давомида тинчлик музокараларини ўтказишга уринишларига қарамай, мулоқотни рад этган.
G20 саммити (энг ривожланган ва ривожланаётган иқтисодиётига эга мамлакатлар, жумладан, Европа Иттифоқи давлатлари, АҚШ, Россия, Хитой, Буюк Британия, Бразилия, Саудия Арабистони ва бошқаларни бирлаштиради) 15—16 ноябрь кунлари Балида бўлиб ўтади. Индонезия апрель ойида G20 етакчиларига таклиф юборган. Украина ассоциацияга аъзо бўлмаса-да, тадбирга президент Владимир Зеленский ҳам таклиф этилган.
Изоҳ (0)