Eron Rossiyaga qurol yetkazib berishni kuchaytirmoqda: dronlardan keyin Tehron Ukrainaga zarba berishda qo‘llanilishi mumkin bo‘lgan qisqa masofali ballistik raketalarni ham Moskvaga yashirincha yuborishga rozi bo‘lgan, deb yozmoqda The Washington Post.
Sentabr oyi oxirida Eron Rossiyaga delegatsiya yuborgan, unga qo‘shimcha qurol-yarog‘ bilan ta’minlash shartlarini uzil-kesil kelishib olish vazifasi yuklatilgan, deya ma’lum qildi AQSH ittifoqchilaridan birining razvedka xizmatlari. Ushbu razvedka ma’lumotlari Ukraina va AQSHga ham berilgan.
Razvedka ma’lumotlariga ko‘ra, Fateh-110 va Zolfaghar “yer-yer” raketalarining birinchi partiyasi Rossiyaga yetkazish uchun tayyorlanmoqda. Ular mos ravishda 300 kilometrdan 700 kilometrgacha bo‘lgan masofadagi nishonlarga zarba bera oladi. Bu urush boshlanganidan beri Eron raketalarining Rossiyaga yetkazilishi bo‘yicha birinchi hodisa bo‘ladi.
Fateh-110 va Zolfaghar’ning eng yangi versiyalari kuchli va aniq boshqariluvchi raketalar hisoblanadi, deb yozmoqda WP ekspert bahosiga tayanib. Ayrim modellar elektro-optik boshqaruv tizimlari bilan ham jihozlangan bo‘ladi, bu nishonga yaqinlashganda raketalarni boshqarishga imkon beradi.
Eron nafaqat dronlarni, balki ballistik raketalarini ham yetkazib berish orqali Rossiyaning Ukrainadagi imkoniyatlari va harbiy qudratini oshirishi mumkin, deydi Vashingtondagi Yaqin Sharq siyosati institutining qurollar bo‘yicha eronlik eksperti Farzin Nadimiy.
WP xabariga ko‘ra, Eron, shuningdek, Mujaher-6 va Shahed-136 dronlarining yangi partiyasini Rossiyaga yetkazib berishga tayyorlanmoqda. Bundan tashqari, eronlik texnik xodimlar so‘nggi haftalarda Rossiya nazoratidagi Ukraina hududlariga borib, rossiyalik harbiylarga dronlarni boshqarishni o‘rgatgan, deb yozadi gazeta.
Eron Rossiyaga qurol yetkazib berayotganini rad etib keladi. Rossiya prezidenti matbuot kotibi Dmitriy Peskov dronlarni yetkazib berish haqidagi xabarlarni izohlar ekan, The Washington Post gazetasi “so‘nggi paytlarda ishonchli bo‘lmagan ko‘plab ma’lumotlar tarqatayotgani”ni aytdi.
Mutaxassislarning fikricha, Erondan qurol yetkazib berish hajmining oshishi Rossiyaning Ukrainadagi yetti oylik urushda yo‘qotgan raketalari o‘rnini qoplashga yordam berishi kerak.
Izoh (0)