АҚШ Россияга «хавфли қурол» етказиб бераётган Эронга санкциялар билан таҳдид қилди

Эрон Россияга «хавфли қуроллар»ни етказиб беришига йўл қўймаслик учун, АҚШ унга қарши санкцияларни кучайтиришга тайёр, дейилади Давлат департаменти хабарида.

Америка дипломатик идорасида қайд этишларича, Россия Украинадаги низоларда Эронда ишлаб чиқарилган учувчисиз учар қурилмаларни қўллаётгани, Теҳрон эса тез орада бундай дронлардан янада кўпроқ етказиб бериши мумкинлиги борасида АҚШда талайгина далиллар мавжуд.

«Биз Россияга хавфли қурол тақдим этилишига йўл қўймаслик учун иттифоқдошларимиз ва шерикларимиз билан ишлашга қатъий қарорлимиз. Биз бу етказмаларга алоқадор бўлганларнинг барчасига санкциялар ва бошқа тегишли воситаларимизни ҳеч қандай иккиланишларсиз қўллаймиз», — дейилади Давлат департаменти хабарида.

Россия расмийлари Украинада «Орлан-10», «Лансет», «Иноходец», шунингдек, «Геран-2» учувчисиз учар қурилмалари қўлланилаётганини расман тасдиқлаган эди. Уларнинг охиргиси, Америка ва Украина ҳукуматлари даъво қилишича, Эроннинг Shahed туридаги жанговар учар қурилмаси версиясидир. Вашингтон Эроннинг Россияга бир неча юзтагача дронлар, шу жумладан, Shahed-191 ва Shahed-129 дронларини етказиб бериш режалари ҳақида ахборотга эга эканини АҚШ ёздаёқ маълум қилганди.

Эрон Ташқи ишлар вазирлиги буни тасдиқламаган ва АҚШнинг айбловларини асоссиз деб атаган эди. Россия президенти вакили Дмитрий Песков эса бундай хабарлар — дезинформация, деган эди. Президент ёрдамчиси Юрий Ушаков айтишича, Путин июль ойида Теҳронга ташрифи чоғида учувчисиз учар қурилмалар етказиб бериш масаласини муҳокама қилмаган.

19 октябрь куни Эроннинг БМТдаги доимий вакили Амир Саид Ираваний Теҳрон Россияга жанговар дронлар етказиб бераётганини қатъиян рад этишини яна бир бора маълум қилди. Унинг сўзларига кўра, сиёсий кун тартибини илгари суриш ортидан мамлакатлар «Эронга қарши дезинформация кампаниясини ишга туширишга интилаётгани» ҳафсалани пир қилади.

Ираванийнинг баёноти АҚШ, Буюк Британия ва Франция Бирлашган Миллатлар Ташкилоти Хавфсизлик кенгашининг 19 октябрда ўтказилган ёпиқ мажлисида Эроннинг Россияга қурол етказиб бериши масаласини кўтарганига жавобан янгради.