Айни пайтда 50 дан ортиқ халқаро компаниялар ўз базаларини Россиядан Қозоғистонга кўчириб ўтказган. Бу ҳақда Қозоғистон президенти Қосим-Жўмарт Тўқаев Алмати вилоятида жамоатчилик билан учрашув чоғида маълум қилди, деб ёзади Asia Plus.
«Уларнинг барчасини йирик шаҳарларга тўплаш маҳсулдор бўлмайди. Ҳокимият бундай ишлаб чиқариш объектларини Алмати яқинига катта автомобиль ҳалқа йўли бўйлаб жойлаштириш масаласини ўрганиб чиқиши керак, бу вилоят иқтисодиётига сезиларли даражада ёрдам беради», — деди Тўқаев.
Бош вазир Алихан Смаилов 19 октябрь куни Қозоғистон парламенти қуйи палатаси йиғилишида дунё компанияларининг 300 таси ўз офислари ва корхоналарини Россиядан Қозоғистонга кўчириб ўтказишга тайёрлигини маълум қилди.
Унинг сўзларига кўра, ҳукумат кўчириш масаласини батафсил кўриб чиқиш учун йирик фирмалар рўйхатини тузган.
«Бугунги кунда 56 та компания бизнинг мамлакатимизда ишлашга тайёр. Улар билан релокация қилиш бўйича шартлар, вақт ва жой борасида мавзули ишлар олиб борилмоқда», — деди бош вазир.
Унинг маълумотларига кўра, бир нечта компаниялар аллақачон Қозоғистонга кўчиб келган. Улар орасида Honeywell, inDriver, Fortescue, Marubeni ва бошқалар бор.
Россия-Украина низоси бошланганидан буён мингдан ортиқ чет эл компаниялари Россияни тарк этди. Масалан, Starbucks ва McDonald’s франшизаларини россиялик бизнесменлар сотиб олиб, уларнинг номларини ўзгартирди.
Қозоғистон президенти Тўқаев Россия бозоридан кетган хорижий компаниялар Қозоғистонга релокация қилиши учун қулай шароитлар яратишни ҳукумат зиммасига юклади.
Изоҳ (0)