Toshkent shahri 17-oktabr kuni dunyodagi havosi eng iflos shaharlar reytingida birinchi o‘ringa chiqqani haqida xabar berilgandi. Holat yuzasidan Toshkent shahar Ekologiya va atrof-muhitni muhofaza qilish boshqarmasining Atrof-muhit ifloslanishini monitoring qilish bo‘limi xodimlari tomonidan poytaxtning 5 ta nuqtasidan tahlil natijalari olindi.
Qayd etilishicha, ushbu jarayonga Davlat ekologiya qo‘mitasining mobil laboratoriyasi va mutaxassislari jalb etilib, namunalar asosida tahlillar amalga oshirilgan.
Olingan namuna natijalari 2-nuqta (Yunusobod tumani 6-mavze)da umumiy chang miqdori bo‘yicha belgilangan (PDK) me’yordan ortiqligini ko‘rsatgan.
Mutaxassislar fikriga ko‘ra, uzoq vaqt davomida yog‘ingarchilikning yo‘qligi, kuchsiz shamollar, haroratning inversiyasi atmosfera havosining turg‘unligiga imkon bergan. Buning natijasida ifloslantiruvchi moddalarning to‘planishi kuzatilgan.
Ta’kidlanishicha, 17-oktabrdan 18-oktabrga o‘tar kechasi yog‘ingarchilik tufayli Toshkent shahri havosi chang-to‘zonlardan tozalanib, xalqaro darajadagi standartlarga ko‘ra, havo ifloslanishi ko‘rsatkichi 38-o‘rinni qayd etgan.
AQSHning Havo sifati indeksi reytingining 18-oktabr soat 15:08 holatiga bergan ma’lumotlariga ko‘ra, Toshkent havo ifloslanishi ko‘rsatkichi bo‘yicha dunyoda 28-o‘rinda bormoqda.
Yog‘ingarchilikdan keyin Toshkent shahar havosining holatini aniqlash maqsadida mobil laboratoriya orqali takroran o‘lchash ishlari amalga oshirilgan. Unga ko‘ra, havoning ifloslanish holatlari kuzatilmagan.
Izoh (0)