Toshkent shahridagi Malika bozori qarshisida daraxtlar osti betonlab ketilganiga doir xabarlar tarqaldi.
Xabarga “tegishli tashkilotlardan daraxtlarni ostini ochib saqlab qolishda amaliy yordam so‘raymiz. Har holda daraxtlar yashnab turibdi. Ular qurib qolsa yana o‘zimizga qiyin”, — deya izoh berilgan.
“Daryo” muxbiri ushbu holatni o‘rganish uchun videoda ko‘rsatilgan joyga yetib bordi. Ushbu videoda haqiqatan ham daraxtlar osti betonlanganiga guvoh bo‘lish mumkin.
Holatga aniqlik kiritish maqsadida Davlat ekologiya qo‘mitasi matbuot xizmati bilan bog‘landik. Qo‘mita matbuot kotibi Ismatulla Do‘stmurodov tegishli chora-tadbirlar ko‘rilayotganiga qaramay, bu kabi holatlar tugamayotgani, har bir muammoni joyida tezkorlik bilan bartaraf etishga qo‘mita doim ham vaqt topa olmayotgani, fuqarolar, tashkilot mutasaddilari, tadbirkorlar bunday hodisalarni o‘z tashabbusi bilan to‘xtatishga harakat qilishi, ekomadaniyatni, tabiatga, daraxtlarga nisbatan yaxshi munosabatni oila, maktab, bog‘chadan shakllantirishga e’tibor qaratish muhimligini ta’kidlab, Malika bozori ro‘parasidagi ushbu holatga aynan kim tomonidan yo‘l qo‘yilgani bo‘yicha aniq ma’lumotga ega emasligini bildirdi.
Matbuot kotibidan Toshkent shahar ekologiya va atrof-muhitni muhofaza qilish boshqarmasi huzuridagi Yunusobod tuman markazi telefon raqamini oldik va qayta-qayta qo‘ng‘iroq qilishimizga qaramay, bog‘lanishning iloji bo‘lmadi.
Birozdan so‘ng bizga qo‘ng‘iroq qilib, o‘zini Yunusobod tumani obodonlashtirish boshqarmasi boshlig‘ining birinchi o‘rinbosari deya tanishtirgan Umidxo‘ja Umarxo‘jayev tez orada boshqarma xodimlari voqea joyiga yetib borib daraxtlar ostidagi betonni ochishlari va jarayon aks etgan tasvirlarni bizga yetkazishlarini ma’lum qildi.
Holat aynan qayerda sodir etilganini bilish uchun biz bilan bog‘langan xalq nazorati bo‘yicha ijrochi Tursunboy Ahmedov esa hozir yomg‘ir yog‘ayotgani, havo biroz ochilgach, daraxtlarning tagidagi betonni ko‘chirib tashlashlarini, agar bugun yog‘ingarchilik davom etsa, uzog‘i bilan ertaga chora ko‘rilib, uning dalili sifatida foto hamda video tasvirlarni bizga jo‘natishini aytdi.
Izoh (0)