O‘zbekistonning Hindistondagi elchisi Dilshod Ahatov ushbu davlat Sayyohlik agentlari uyushmasi prezidenti (Travel Agents Association of India — TAAI) Jyoti Mayal va Tashqi turoperatorlar uyushmasi prezidenti Riaz Munshi bilan uchrashuvlar o‘tkazdi, deb xabar qilmoqda “Dunyo” AA.
Qayd etilishicha, uchrashuvlarda mamlakatlar o‘rtasidagi turizm sohasidagi hamkorlikning joriy holati muhokama qilindi, sayyohlar oqimini oshirish bo‘yicha amaliy chora-tadbirlar to‘g‘risida fikr almashildi.
Hindiston Sayyohlik agentlari uyushmasi prezidenti Jyoti Mayal O‘zbekistonning turizm sohasidagi yuqori salohiyatini e’tirof etib, hindistonlik sayyohlar oqimini keskin oshirish bo‘yicha hamkorlikka tayyor ekanligini ta’kidladi.
Hindiston Tashqi turoperatorlari uyushmasi prezidenti Riaz Munshi O‘zbekiston an’anaviy ravishda hind sayyohlari o‘rtasida eng sevimli yo‘nalishlardan biri ekanini qayd etdi. Hamkorlikning samaradorligini yanada kengaytirish maqsadida ikki mamlakat o‘rtasidagi mavjud aviaqatnovlar sonini oshirish imkoniyatlari muhokama qilindi.
Ushbu ikki yetakchi sayyohlik uyushmalari rahbariyati bilan 2022-yil yakuniga qadar va 2023-yilda hamkorlikda amalga oshiriladigan tadbirlar va rejalar xususida batafsil fikr almashildi.
Ma’lumot uchun, Hindiston Sayyohlik agentlari uyushmasi 1951 yilda tashkil topgan bo‘lib, bugungi kunda uning tarkibiga 2 ming 500 dan ortiq sayyohlik sohasida faoliyat olib boruvchi turli kompaniyalar kiradi. Hindiston Tashqi turoperatorlari uyushmasi mamlakatning turizm sohasidagi eng yirik uyushmalaridan biri bo‘lib, hozirgi vaqtda unga a’zo bo‘lgan turkompaniya va agentliklar soni ikki mingdan oshadi.
Mavzuga doir: O‘zbekistonga 9 oyda qancha sayyoh kelgani ma’lum bo‘ldi
Izoh (0)