Qirg‘izistonning ikki banki — “Bakai Bank” va “Doskredobank” 17-oktabrdan beri MIR kartalariga xizmat ko‘rsatmayapti. Bu haqda bank bayonotlariga tayanib “Kommersant” xabar bermoqda.
Avvalroq xuddi shunday qaror Qirg‘izistonning “Kompanion” banki tomonidan ham qabul qilingan bo‘lib, u 4-oktabrdan boshlab Rossiyaning 21 banki tomonidan chiqarilgan MIR kartalariga xizmat ko‘rsatishni to‘xtatgan edi.
“Milliy to‘lov kartalari tizimi NSPK (Milliy to‘lov kartalari tizimi) bank qurilmalarida xizmat ko‘rsatish vaqtincha to‘xtatildi”, — deyiladi “Bakai Bank” bayonotida.
Qirg‘iziston banklari 2019-yildan beri MIR kartalari bilan ishlamoqda. Mamlakatda jami 23 ta bank faoliyat yuritadi. Qirg‘iziston Milliy bankining ta’kidlashicha, banklar muayyan to‘lov tizimi bilan hamkorlik qilish to‘g‘risida mustaqil ravishda qaror qabul qiladi.
Avvalroq O‘zbekistonda ham MIR kartalariga xizmat ko‘rsatish to‘xtatilgan edi. AQSH MIR kartalari tufayli xorijiy banklar uchun sanksiyalar xavfini e’lon qilgan.
Buning ortidan Turkiyaning ikkita yirik banki MIR kartalari bilan operatsiyalarni to‘xtatgan edi. Keyinchalik Qozog‘iston va Vyetnam banklari ham MIR kartalariga xizmat ko‘rsatmasligini ma’lum qilgan.
Izoh (0)