17-oktabrda Xitoy davlat banklari zaiflashib borayotgan yuan kursini himoya qilish uchun intervensiyani kuchaytirdi. Bu haqda Reuters xabar bermoqda.
Agentlikka aksariyat banklar katta hajmdagi dollarni sotgani hamda svop va spot savdolar kombinatsiyasidan foydalanganini bildirdi.
Svop — bitimda belgilangan muddat va valyuta kursi bo‘yicha hisoblashish (qayta almashuv) sharti asosida valyutalarni bir vaqtda sotib olish va sotish bo‘yicha ikki tomonlama bitimdir.
Valyutaviy svop operatsiyasi ikki qismdan iborat bo‘lib, birinchi qismini amalga oshirishda valyutalarning dastlabki almashinuvi (spot bitim), ikkinchi qismini bajarishda esa, qayta almashinuvi (forvard bitimi) va svop shartnomasining yopilishi sodir bo‘ladi.
Oltita bank manbasining ma’lum qilishicha, mamlakatning yirik davlat banklari forvard bozorida yuanni dollarga almashtirgan va bu dollarlarni spot bozorda sotgan. Bunday valyuta intervensiyasi Xitoy tomonidan 2018—2019-yillarda ham qo‘llanilgan.
Valyuta intervensiyasi — mamlakat markaziy bankining valyuta bozoriga va valyuta kursiga chet el yoki milliy valyutaning katta summasini sotib olish yoki sotish yo‘li bilan aralashuvi.
Shundan so‘ng, forvard kursi bir dollar uchun 6,95 yuanga tushdi. Agentlik manbalaridan birining ta’kidlashicha, operatsiya Xitoyning valyuta zaxiralariga (3 trillion dollar) ta’sir qilmagan.
26-sentyabr kuni Xitoy Xalq banki yuan kursini bir dollar uchun 7,0722 ga tushirdi, bu 2022-yil 30-iyundan beri eng past ko‘rsatkichdir.
Joriy yilda yuan dollarga nisbatan 11 foizdan ortiq zaiflashdi. Xitoy Markaziy banki dollar bo‘yicha forvard shartnomalarining zaxira normasini noldan 20 foizgacha oshirdi.
Mavzuga doir:
Izoh (0)