17-oktabrda yapon iyenasining dollarga nisbatan kursi 32 yil davomidagi eng past darajaga tushib ketdi. Buni Tokiodagi valyuta savdosi ma’lumotlari tayanib, “TASS” xabar bermoqda.
Toshkent vaqti bilan 16:00 holatiga ko‘ra, kurs bir dollar uchun 148,87—148,89 iyenani tashkil qildi. Yapon valyutasi oxirgi marta bunday qiymatlarni 1990-yilning yozida qayd etgan.
O‘tgan haftada Yaponiya milliy valyutasi bir necha marta 32 yillik eng past ko‘rsatkichni yangilagan edi.
Iyena kursining rekord darajada zaiflashishi bir necha oy davomida inflyatsiyani jilovlash uchun uni oshirayotgan G‘arb markaziy banklarining diskont stavkalaridagi farqning kengayishi fonida davom etmoqda.
Mamlakatning pul-kredit siyosati iyenaning zaiflashishiga va narxlarning oshishiga olib kelishi haqidagi tanqidlarga qaramay, Yaponiya Markaziy banki rahbari Xaruxiko Kuroda regulyator hech qanday chora ko‘rish niyatida emasligini bir necha bor ta’kidlagan.
Sentabr oyi oxirida yana bir bor qisqa muddatli foiz stavkasini minus 0,1 foiz darajasida saqlashga qaror qilindi.
Bunday sharoitda sentabr oyi oxirida Yaponiya hukumati 1998-yildan beri birinchi marta milliy valyuta kursini barqarorlashtirish maqsadida valyuta intervensiyalarini amalga oshirdi.
Bu uning qisqa muddatli mustahkamlanishiga olib keldi. Biroq keyin zaiflashuv yana tez sur’atda davom etdi.
Mavzuga doir:
Izoh (0)