Қирғизистоннинг икки банки — «Bakai Bank» ва «Doskredobank» 17 октябрдан бери МИР карталарига хизмат кўрсатмаяпти. Бу ҳақда банк баёнотларига таяниб «Коммерсантъ» хабар бермоқда.
Аввалроқ худди шундай қарор Қирғизистоннинг «Компанион» банки томонидан ҳам қабул қилинган бўлиб, у 4 октябрдан бошлаб Россиянинг 21 банки томонидан чиқарилган МИР карталарига хизмат кўрсатишни тўхтатган эди.
«Миллий тўлов карталари тизими NSPK (Миллий тўлов карталари тизими) банк қурилмаларида хизмат кўрсатиш вақтинча тўхтатилди», — дейилади «Bakai Bank» баёнотида.
Қирғизистон банклари 2019 йилдан бери МИР карталари билан ишламоқда. Мамлакатда жами 23 та банк фаолият юритади. Қирғизистон Миллий банкининг таъкидлашича, банклар муайян тўлов тизими билан ҳамкорлик қилиш тўғрисида мустақил равишда қарор қабул қилади.
Аввалроқ Ўзбекистонда ҳам МИР карталарига хизмат кўрсатиш тўхтатилган эди. АҚШ МИР карталари туфайли хорижий банклар учун санкциялар хавфини эълон қилган.
Бунинг ортидан Туркиянинг иккита йирик банки МИР карталари билан операцияларни тўхтатган эди. Кейинчалик Қозоғистон ва Вьетнам банклари ҳам МИР карталарига хизмат кўрсатмаслигини маълум қилган.
Изоҳ (0)