Rossiya prezidenti matbuot kotibi Dmitriy Peskovning aytishicha, Vladimir Putinning safarbarlik haqidagi farmonida 300 ming kishini armiyaga chaqirish nazarda tutilgan va bu raqamlar oshmaydi.
“Farmonda belgilangan umumiy son — 300 ming kishidan oshirish haqida gap bo‘lishi mumkin emas”, — dedi Kreml matbuot kotibi. U buni Mudofaa vazirligi prezidentning “qisman safarbarlik to‘g‘risida”gi farmoni asosida hududlarga yangi son chegaralarini belgilashi va yangi vazifalarni yuborishi mumkinmi, degan savolga javoban aytdi.
Peskovning qo‘shimcha qilishicha, ayrim hududlarda belgilangan chegaraga yetib, safarbarlik topshiriqlari bajarib bo‘lingan.
Xabaringiz bor, Mudofaa vazirligi tomonidan har bir hudud bo‘yicha safarbarlik kuchlari soni belgilab berilgan, hududlar safarbarlik topshiriqlari bajarilgani haqida birin-ketin ma’lum qilmoqda. Shunday qilib, qisman safarbarlik jarayoni ushbu vazifani bajargan hududlarda to‘xtatilmoqda — dedi Peskov.Shu bilan birga, u “qisman safarbarlik”ni butunlay yakunlash to‘g‘risida hali prezident farmoni yo‘qligini ta’kidladi.
Safarbarlik qachon e’lon qilingan edi?
21-sentabr kuni Rossiya prezidenti Vladimir Putin Rossiyada qisman safarbarlik e’lon qilish haqidagi farmonni imzoladi. Rossiya mudofaa vaziri Sergey Shoyguning aytishicha, qisman safarbarlik chog‘ida 300 ming zaxiradagi askar chaqiriladi. Uning so‘zlariga ko‘ra, bu Rossiya safarbarlik resursining taxminan 1 foizini tashkil qiladi.Armiyaga chaqiriladigan odamlar soni ko‘rsatilgan band safarbarlik haqidagi farmonda maxfiylashtirib qo‘yilgan. “Novaya gazeta. Yevropa” nashri xabariga ko‘ra, ushbu bandda bir million kishi armiyaga chaqirilishi haqida aytiladi. Meduza’ning federal vazirliklardan biriga yaqin manbasi aytib berishicha, armiyaga 1,2 million kishini chaqirish rejalashtirilmoqda.
Peskov Meduza va “Novaya gazeta”ning ma’lumotlarini yolg‘on deb atadi.
14-oktabr kuni Vladimir Putin armiyaga 222 ming kishi jalb qilingani, ulardan 33 ming nafari bo‘linmalarda, 16 ming nafari esa jangovar topshiriqlarni bajarayotganini ma’lum qildi. Prezident safarbarlikni ikki hafta ichida yakunlashga va’da berdi. Ba’zi viloyatlar, masalan, Moskva va Moskva viloyati hokimiyatlari o‘zlarining safarbarlik rejalarini bajarib bo‘lgani to‘g‘risida hisobot berdi.
Izoh (0)