AQSH prezidenti Jo Bayden o‘z lavozimiga kirishganidan buyon vaqtining chorak qismidan ko‘pini Delaverdagi ikkita qarorgohidan birida ishlab o‘tkazgan, bu sobiq prezident Donald Trampning Mar-a-Lagodagi uyiga qilgan safarlaridan ham ko‘proq demakdir. Bu haqda Daily Mail yozmoqda.
16-oktabr, yakshanba holatiga, 174 kun ichida prezident Bayden Delaverga 55 marta safar qilgan.
O‘z ona shtatiga safarlardan tashqari, Bayden Merilenddagi prezident qarorgohiga 19 marta borib, 64 kunini o‘sha yerda o‘tkazgan. Bu raqamlar shuni bildiradiki, Bayden bo‘sh vaqtini Oq uydan uzoqda o‘tkazish bo‘yicha o‘zidan avvalgi barcha prezidentlar, shu jumladan, Trampni ham ortda qoldirgan.
Tramp dam olish kunlari tez-tez Vashingtondan uzoqda, xususan, Nyu-Jersi va Floridadagi kurortlarda joylashgan shaxsiy qarorgohlarida bo‘lgani uchun ko‘p tanqidlarga uchragan edi. U o‘z prezidentligining xuddi shuncha davrida Florida va Nyu-Jersidagi uylarida jami 135 kun, Kemp-Deviddagi retritda esa 23 kun o‘tkazgan.
O‘z prezidentligining ikki yildan kamroq qismi mobaynida Delaver va Merilendda 236 kun bo‘lish — ancha katta muddat, deyiladi xabarda.
Jorj Bush prezidentlik lavozimida o‘tkazgan 8 yillik umrining 490 kunini Texasdagi ranchosida o‘tkazgan, Ronald Reygan esa Kaliforniyadagi ranchosida ikkita muddatining 349 kunini o‘tkazgan.
Agar Bayden shu sur’atda davom etsa, Oq uydan uzoqda vaqt o‘tkazish bo‘yicha ikkita emas, bitta muddatning o‘zidayoq kichik Bush va Reyganni ortda qoldiradi, deyiladi xabarda.
AQSH prezidenti dam olish kunlari Delaverga ketgan paytda muhim yangiliklar paydo bo‘lsa, odatda Oq uy Bayden Vashingtondan uzoqda turib bo‘lsa ham amalga oshirgan qo‘ng‘iroqlar qayd etilgan press-relizlarni tarqatadi.
“Hozir 1922-yil emas, 2022-yil. Mamlakatning qolgan qismi uyidan ishlayotgan paytda, AQSH prezidenti ham shunday qiloladi”, — dedi Jo Baydenning rafiqasi Jill Baydenning sobiq matbuot kotibi Maykl LaRosa.
“U dam olish kunlari jismonan Oq uyda bo‘lmasa, demak ishlamayapti, deb o‘ylash biroz eskicha qarashlar emasmi?” — dedi LaRosa.
Avgust oyida Bayden lavozimiga kirishganidan buyon 228 kun ta’tilda bo‘lgani xabar berilgandi.
Izoh (0)