Ijtimoiy tarmoqlarda O‘zbekiston banklari chet el valyutasini sotib olishga cheklov joriy qilgani, jumladan, yirik banklar va filiallarda bu cheklov 1,5 ming dollarni, kichiklarida esa 500 dollarni tashkil qilayotgani haqida xabarlar tarqaldi.
“Xabar.uz” mazkur ma’lumotga aniqlik kiritish uchun bog‘langan Markaziy bank mutaxassisiga ko‘ra, ayni vaqtda jismoniy shaxslar tomonidan tijorat banklari orqali chet el valyutasini sotib olish va sotish, shuningdek, pul o‘tkazmalarini amalga oshirish cheklovlarsiz amalga oshirilmoqda.
Markaziy bank tomonidan hech qanday cheklov o‘rnatilmagan. Agar fuqarolarimiz banklarda shunday faktlarni aniqlagan bo‘lishsa, o‘sha bank ma’muriyatidan izoh so‘rashlari mumkin. Mutaxassislarimiz biz tomondan bunday ko‘rsatma bo‘lmaganini aytishdi, — deydi Markaziy bank matbuot kotibi Akmal Nazarov.
Uning ta’kidlashicha, banklar o‘z faoliyatlarini tashkillashtirishda mustaqil hisoblanadi.
Naqd xorijiy valyutaning vaqtincha taqchilligi banklarning uzoqdagi filiallariga naqd pul belgilarining logistikasi bilan bog‘liq bo‘lishi mumkin, — deydi Akmal Nazarov.
Izoh (0)