17 октябрда япон иенасининг долларга нисбатан курси 32 йил давомидаги энг паст даражага тушиб кетди. Буни Токиодаги валюта савдоси маълумотлари таяниб, «ТАСС» хабар бермоқда.
Тошкент вақти билан 16:00 ҳолатига кўра, курс бир доллар учун 148,87—148,89 иенани ташкил қилди. Япон валютаси охирги марта бундай қийматларни 1990 йилнинг ёзида қайд этган.
Ўтган ҳафтада Япония миллий валютаси бир неча марта 32 йиллик энг паст кўрсаткични янгилаган эди.
Иена курсининг рекорд даражада заифлашиши бир неча ой давомида инфляцияни жиловлаш учун уни ошираётган Ғарб марказий банкларининг дисконт ставкаларидаги фарқнинг кенгайиши фонида давом этмоқда.
Мамлакатнинг пул-кредит сиёсати иенанинг заифлашишига ва нархларнинг ошишига олиб келиши ҳақидаги танқидларга қарамай, Япония Марказий банки раҳбари Харухико Курода регулятор ҳеч қандай чора кўриш ниятида эмаслигини бир неча бор таъкидлаган.
Сентябрь ойи охирида яна бир бор қисқа муддатли фоиз ставкасини минус 0,1 фоиз даражасида сақлашга қарор қилинди.
Бундай шароитда сентябрь ойи охирида Япония ҳукумати 1998 йилдан бери биринчи марта миллий валюта курсини барқарорлаштириш мақсадида валюта интервенсияларини амалга оширди.
Бу унинг қисқа муддатли мустаҳкамланишига олиб келди. Бироқ кейин заифлашув яна тез суръатда давом этди.
Мавзуга доир:
Изоҳ (0)