Qo‘qon shahridagi O‘rda maydonida “Qo‘qon etnosport chellenj — 2022” xalq milliy o‘yinlari va sirk san’ati xalqaro festivali bo‘lib o‘tdi. Bu haqda “Daryo” muxbiri Azizjon Ermatov xabar bermoqda.
Qayd etilishicha, festival O‘zbekiston prezidentining 2022-yil 29-iyuldagi “Turkiy davlatlar bilan turizm sohasidagi hamkorlikni jadal rivojlantirish chora-tadbirlari to‘g‘risida”gi qaroriga asosan tashkil etilgan.
Turizm va madaniy meros vazirligi, Farg‘ona viloyati hokimligi hamda O‘zbekiston etnosport assotsiatsiyasi hamkorligida o‘tkazilgan festivalda mamlakatimizning barcha hududlaridan jamoalar, shuningdek, Qirg‘iziston vakillari qatnashgan.
Festivalda chavandozlik, uloq, ko‘pkari, dorbozlik, merganlik, tosh ko‘tarish, kurash, arqon tortish kabi xalq milliy o‘yinlari namoyishi, ko‘rgazmali chiqishlar va musobaqalar o‘tkazilgan.
Shuningdek, festival davomida milliy matolar, hunarmandchilik va kulolchilik mahsulotlari ko‘rgazmalari namoyish etilgan.
Festival dasturidan o‘rin olgan bir-biridan qiziqarli milliy xalq o‘yinlari hamda sirk tomoshalari tadbir ishtirokchilari va sayyohlarga unutilmas taassurotlar ulashgan.
Ma’lumot uchun, 2022-yilda Qo‘qon shahri “Turkiy dunyoning turizm poytaxti” deb e’lon qilingan.
Izoh (0)