O‘zbekistonning AQSHdagi elchisi Javlon Vahobov akademik aloqalarni mustahkamlash borasidagi ishlar doirasida Texas “A&M” (Texas A&M) universiteti huzuridagi Jorj Bush nomidagi hukumat va davlat xizmati maktabining katta dekani Frenk Eshli bilan uchrashdi, deb xabar bermoqda “Dunyo” AA.
Ma’lum qilinishicha, suhbat chog‘ida O‘zbekistondagi ixtisoslashtirilgan oliy o‘quv yurtlari bilan akademik aloqalarni yo‘lga qo‘yish, shuningdek, o‘zaro delegatsiyalar almashuvini tashkil etish orqali davlat xizmatchilarini tayyorlash va ularning malakasini oshirish tizimini takomillashtirish jarayoniga Amerika tomonini jalb etish istiqbollari muhokama qilindi.
Amerika tomoniga O‘zbekistonda har tomonlama barkamol, ijodiy fikrlaydigan rahbar va davlat xizmatchilari tayyorlashga qaratilayotgan alohida e’tibor, shuningdek, davlat boshqaruvi, kadrlar siyosati, kadrlar tayyorlash, qayta tayyorlash va malakasini oshirish sohasidagi tizimli o‘zgarishlarning samaralari haqidagi ma’lumotlar taqdim etildi.
Frenk Eshli, o‘z navbatida, O‘zbekistonning zamon talabiga javob beradigan yangi avlod kadrlarini tayyorlash bo‘yicha jahondagi ilg‘or tajribani joriy etishga intilishi, shubhasiz, mamlakatning uzoq muddatli va barqaror rivojlanishga sezilarli va ijobiy ta’sir ko‘rsatishini aytdi. Shu nuqtayi nazardan, Amerika tomoni fuqarolar bilan aloqa o‘rnatishning zamonaviy usullarini joriy etish, davlat organlari tomonidan aholini xabardor qilishning ilg‘or texnologiyalaridan foydalanish zarurligiga e’tibor qaratdi.
Jorj Bush maktabi rahbariyati O‘zbekiston oliy o‘quv yurtlari va kafedralari bilan ixtisoslashtirilgan yo‘nalishlar bo‘yicha ikki darajali ta’lim tizimini joriy etish, O‘zbekiston davlat xizmati vakillari uchun AQSHda qisqa muddatli, o‘rta muddatli va magistratura ta’limi dasturlarini tashkil etish kabi yo‘nalishlarda hamkorlik qilishga tayyor ekanliklarini ma’lum qildi.
Maktab o‘qituvchilari va o‘quvchilarning tajriba almashish uchun respublikaga tashrifini tashkil etish, davlat boshqaruvining eng yangi uslublari asosida qo‘shma dastur va kurslar ishlab chiqish imkoniyatlari qayd etildi.
Bush maktabi 1997-yilda AQSHning 41-prezidenti Jorj Bushning “davlat xizmati — oliyjanob da’vat” tamoyiliga muvofiq tashkil etilgan. Ushbu ta’lim muassasasi boshqaruv kadrlarini tayyorlash sohasidagi eng yaxshi universitetlardan biri hisoblanadi. Bush maktabida Barak Obama, Pan Gi Mun, Arnold Shvarsenegger, Kondoliza Rays, Ted Kennedi, Gelmut Kol, Dik Cheyni, Kolin Pauell kabi mashhur yetakchi va arboblar ma’ruza qiladi.
Izoh (0)