Қўқон шаҳридаги Ўрда майдонида «Қўқон этноспорт челленж — 2022» халқ миллий ўйинлари ва цирк санъати халқаро фестивали бўлиб ўтди. Бу ҳақда «Дарё» мухбири Азизжон Эрматов хабар бермоқда.
Қайд этилишича, фестиваль Ўзбекистон президентининг 2022 йил 29 июлдаги «Туркий давлатлар билан туризм соҳасидаги ҳамкорликни жадал ривожлантириш чора-тадбирлари тўғрисида»ги қарорига асосан ташкил этилган.
Туризм ва маданий мерос вазирлиги, Фарғона вилояти ҳокимлиги ҳамда Ўзбекистон этноспорт ассоциацияси ҳамкорлигида ўтказилган фестивалда мамлакатимизнинг барча ҳудудларидан жамоалар, шунингдек, Қирғизистон вакиллари қатнашган.
Фестивальда чавандозлик, улоқ, кўпкари, дорбозлик, мерганлик, тош кўтариш, кураш, арқон тортиш каби халқ миллий ўйинлари намойиши, кўргазмали чиқишлар ва мусобақалар ўтказилган.
Шунингдек, фестиваль давомида миллий матолар, ҳунармандчилик ва кулолчилик маҳсулотлари кўргазмалари намойиш этилган.
Фестиваль дастуридан ўрин олган бир-биридан қизиқарли миллий халқ ўйинлари ҳамда цирк томошалари тадбир иштирокчилари ва сайёҳларга унутилмас таассуротлар улашган.
Маълумот учун, 2022 йилда Қўқон шаҳри «Туркий дунёнинг туризм пойтахти» деб эълон қилинган.
Изоҳ (0)