Farg‘ona viloyati O‘zbekiston tumanida aksiz markasiz tamaki mahsulotlarining muomalaga kiritilishi oldi olindi. Bu haqda Iqtisodiy jinoyatlarga qarshi kurashish departamenti xabar berdi.
Qayd etilishicha, Bosh prokuratura huzuridagi departamentning O‘zbekiston tumani bo‘limi tomonidan tezkor tadbir o‘tkazilgan. Unda fuqaro Z.K. boshqa bir fuqaro D.ga xorijda ishlab chiqarilgan ming dona “Milano Skyline”, 1500 dona “Milano Red Grape” va 1600 dona “Milano London” nomli jami 4100 quti aksiz markasiz tamaki mahsulotlarini 37,9 million so‘mga sotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)