Британия бош вазири Лиз Трасс Россиянинг Украинага ракета ҳужумлари туфайли НАТО етакчиларини шошилинч йиғилишга чақирмоқчи. Британия ҳукумати раҳбари бугун, 11 октябрь куни онлайн форматда бўлиб ўтадиган G7 саммитида тегишли мурожаат билан чиқади.
«Ҳеч ким тинчликни Украинадан кўпроқ хоҳламайди. Ўз навбатида, биз уларга ғалаба қозонишда ёрдам беришга бўлган қатъиятимизни заррача сустлаштирмаслигимиз керак», — дея Трасс хонимнинг сўзларидан иқтибос келтирди Reuters. Шунингдек, у иттифоқчилардан Россияга қарши санкциялар сиёсатини давом эттиришни сўрамоқчи.
Қайд этилишича, бугунги саммитда «Катта еттилик» давлатлари энергия хавфсизлиги масаласини ҳам муҳокама қилади.
10 октябрь куни Россия Украина бўйлаб аёвсиз ракета зарбаларини берди. Украина шаҳарларига 80 дан ортиқ ракета ташланган, уларнинг ярми ҳаво ҳужумидан мудофаа тизимлари томонидан уриб туширилган. Украина расмийларининг хабар беришича, Киевнинг ўққа тутилиши оқибатида камида саккиз нафар тинч аҳоли ҳалок бўлган.
Россия президенти Владимир Путиннинг айтишича, Украина шаҳарларининг ўққа тутилиши Керч бўғозидаги Қрим кўпригида содир бўлган портлашга жавоб эди.
Изоҳ (0)