Украина ҳам шимоли-шарқий, ҳам жанубий фронтлардаги ҳужум операцияларида муваффақиятларга эришишда давом этмоқда. Бу ҳақда Буюк Британия Мудофаа вазирлиги ўз Twitter’ида маълум қилди.
Маълумотда айтилишича, шимоли-шарқда, Харьков вилоятида Украина Қуролли кучлари Оскол дарёсидан шарқдаги ҳудудларнинг катта қисмини эгаллаган.
Украина ҳарбийлари дарё ортида, Сватово шаҳри таъминот тугуни томонда Россия мудофаа чизиғига 20 километргача силжиган.
«Катта эҳтимол билан энди Украина ўз артиллерия тизимларидан Сватово—Кременная асосий йўлига зарба бериши мумкин, бу эса Россиянинг шарқдаги ўз бўлинмаларини тўлдириш бўйича имкониятларини янада чеклаб қўяди», — дейилади хабарда.
Британия идораси фикрича, Россия раҳбарияти 30 сентябрь куни босиб олинган Луганск вилояти чегараларига Украина илғор бўлинмалари яқинлашаётганидан хавотирга тушган бўлиши мумкин.
Аввалроқ Украина ҳарбийлари Россия қўшинлари томонидан эгаллаб олинган Херсон вилоятида яна саккизта аҳоли пунктини озод қилгани ҳақида Украина президенти Владимир Зеленский айтиб ўтганди.
Шу ҳафта Херсон вилоятидан ташқари, Харьков, Луганск ва Донецк вилоятларидаги шаҳар ва қишлоқлар ҳам «Россиянинг сохта референдумидан озод этилди», деди Зеленский. Унинг сўзларига кўра, гап озод қилинган ўнлаб аҳоли пунктлари ҳақида бормоқда.
Шунингдек, президент маълум қилишича, Украина армияси мамлакат жанубида «анча тез ва шиддатли тарзда» олға кетишда давом этмоқда.
4 октябрь куни Украина президенти офиси раҳбари ўринбосари Кирилл Тимошенко Донецк, Луганск, Николаев, Харьков ва Херсон вилоятларида 1534 та аҳоли пункти озод этилиб бўлганини маълум қилди. Ўз навбатида, Украина ички ишлар вазири ўринбосари Евгений Енин Херсон вилоятининг ўзида 50 та аҳоли пункти озод қилинганини айтди.
Шу куни Россия Мудофаа вазирлиги Украинадаги жанговар ҳаракатлар харитасини намойиш қилди, унга кўра, Херсон вилоятида фронт чизиғи тахминан 30 километрга жанубга силжиган.
Изоҳ (0)