Bugun, 30-sentabr kuni Davlat bojxona qo‘mitasining Bojxona institutida “Vatanga qasamyod” qabul qilish marosimi bo‘lib o‘tdi, deya xabar bermoqda “Daryo” muxbiri.
Tadbirda kursantlar ustozlari, ota-onalari, keng jamoatchilik guvohligida qasamyod qildi. Davlat bojxona qo‘mitasi raisining birinchi o‘rinbosari Ilhom Muxtorov nutq so‘zlab, vatan oldidagi qasamyod nima ekani haqida gapirdi.
“Hurmatli kursantlar! Vatan va bojxona xizmatiga qasamyodingiz oriyat, g‘urur va sadoqatni hamma narsadan ustun qo‘yadigan bizning xalqimiz uchun oddiy so‘z emas. Balki vatan va xalqimiz oldidagi burchingizni matonat bilan bajarishni anglatuvchi va’dangizdir. Qalbingizda muhrlanadigan bu qasamyodingiz butun hayotingiz davomida halol va pok xizmat qilingiz uchun vatanga sadoqat ifodasi bo‘lib qoladi”, – dedi u.
Aytilishicha, joriy yilda Bojxona institutiga 85 nafar kursant qabul qilindi. Ulardan biri Sardor Sodiqjonov bojxonachi bo‘lish orzusiga yetishayotganidan xursandligini aytdi.
“Men bolaligimdan bojxonachi bo‘lishni orzu qilaman. Ko‘p bosqichli imtihonlardan a’lo darajada o‘tib, Bojxona instituti kursanti bo‘lishdek sharafga erishdim. O‘tgan yillar mobaynida universal jang sport turi bo‘yicha 2 karra jahon chempioni bo‘ldim. Hozirda belbog‘li kurash bo‘yicha sport ustasiman. “Temurbeklar maktabi”ni ham muvaffaqiyatli tamomladim. Bugun kursant sifatida xalqimga sodiq bo‘lishga qasamyod qildim. Kelajakda tanlagan sohamning yetuk mutaxassisi bo‘lishga bor kuvchim bilan intilaman”, – dedi u.
Ma’lum qilinishicha, institutga qabul bir necha bosqichlarda amalga oshirilgan. Xususan, yoshlar jismonan sog‘lomligi va dunyoqarashi darajasiga qarab saralangan.
Izoh (0)