Бугун, 30 сентябрь куни Давлат божхона қўмитасининг Божхона институтида «Ватанга қасамёд» қабул қилиш маросими бўлиб ўтди, дея хабар бермоқда «Дарё» мухбири.
Тадбирда курсантлар устозлари, ота-оналари, кенг жамоатчилик гувоҳлигида қасамёд қилди. Давлат божхона қўмитаси раисининг биринчи ўринбосари Илҳом Мухторов нутқ сўзлаб, ватан олдидаги қасамёд нима экани ҳақида гапирди.
«Ҳурматли курсантлар! Ватан ва божхона хизматига қасамёдингиз орият, ғурур ва садоқатни ҳамма нарсадан устун қўядиган бизнинг халқимиз учун оддий сўз эмас. Балки ватан ва халқимиз олдидаги бурчингизни матонат билан бажаришни англатувчи ваъдангиздир. Қалбингизда муҳрланадиган бу қасамёдингиз бутун ҳаётингиз давомида ҳалол ва пок хизмат қилингиз учун ватанга садоқат ифодаси бўлиб қолади», – деди у.
Айтилишича, жорий йилда Божхона институтига 85 нафар курсант қабул қилинди. Улардан бири Сардор Содиқжонов божхоначи бўлиш орзусига етишаётганидан хурсандлигини айтди.
«Мен болалигимдан божхоначи бўлишни орзу қиламан. Кўп босқичли имтиҳонлардан аъло даражада ўтиб, Божхона институти курсанти бўлишдек шарафга эришдим. Ўтган йиллар мобайнида универсал жанг спорт тури бўйича 2 карра жаҳон чемпиони бўлдим. Ҳозирда белбоғли кураш бўйича спорт устасиман. «Темурбеклар мактаби»ни ҳам муваффақиятли тамомладим. Бугун курсант сифатида халқимга содиқ бўлишга қасамёд қилдим. Келажакда танлаган соҳамнинг етук мутахассиси бўлишга бор кувчим билан интиламан», – деди у.
Маълум қилинишича, институтга қабул бир неча босқичларда амалга оширилган. Хусусан, ёшлар жисмонан соғломлиги ва дунёқараши даражасига қараб сараланган.
Изоҳ (0)