Kollej va texnikumlarning kunduzgi bo‘lmagan shakllari uchun test sinovlari o‘tkazilmaydi — DTM

O‘zbekistondagi professional ta’lim muassasalari (kollej va texnikum)ga 2022/2023-o‘quv yili uchun kirish test sinovlari 3—8-oktabr kunlari 2 smenada o‘tkazilishi haqida xabar berilgandi. Davlat test markazi imtihonlar yuzasidan qo‘shimcha ma’lumot berdi.

Qayd etilishicha, 2022/2023-o‘quv yili uchun professional ta’lim muassasalariga sirtqi, kechki va dual ta’lim shakllari bo‘yicha ro‘yxatdan o‘tgan abituriyentlar test sinovida ishtirok etmaydi. Ular professional ta’lim muassasalari (kollej va texnikum)ga kirish imtihonlarisiz to‘lov-kontrakt asosida qabul qilinadi.

Shuningdek, ro‘yxatdan o‘tishda OTMlarga kirish test sinovida to‘plagan balli bilan tanlovda ishtirok etish istagini bildirgan va fanlar majmuasi mos bo‘lgan talabgorlar test sinovida ishtirok etmaydi.

Ularga test sinovida ishtirok etish uchun ruxsatnoma shaklantirilmaydi va ular OTMlarga kirish test sinovida to‘plagan balli bilan tanlovda ishtirok etadi.