Putin MDHdagi mojarolarni SSSR parchalanishi natijasi deb atadi

Rossiya prezidenti Vladimir Putin G‘arbni postsovet hududida yangi mojarolarni qo‘zg‘atmoqchi ekanlikda ayladi, deb yozadi “RBK”.

“Hozir Rossiya va Ukraina o‘rtasida sodir bo‘layotgan voqealarga, MDHning ba’zi boshqa davlatlari chegaralarida nimalar sodir bo‘layotganiga e’tibor berishning o‘zi kifoya. Albatta, bularning barchasi Sovet Ittifoqining qulashi natijasidir, bularning barchasi tushunarli. Ammo beqarorlik xavfi, jumladan, butun Osiyo-Tinch okeani mintaqasini beqarorlashtirish xavfi hamon ortib bormoqda”, — dedi Rossiya rahbari.

Putinning so‘zlariga ko‘ra, G‘arb MDH makonida yangi mojarolarni qo‘zg‘atish ssenariylari ustida ishlamoqda. Shu bilan birga, u tashqi va ichki xavfsizlikni MDH barqaror rivojlanishining eng muhim omili deb atadi.

Putin MDH davlatlarini aniq va izchil harakat qilishga, o‘zaro yordamni doimiy ravishda kuchaytirishga chaqirdi. “Mana shu yo‘l bilan biz jahon sahnasida o‘z manfaatlarimizni himoya qila olamiz, yomon niyatlilarni daf qila olamiz”, — dedi u.

Vladimir Putin o‘zining ommaviy chiqishlarida Sovet Ittifoqining parchalanishiga bir necha bor eslab o‘tgan. 2005-yilda u SSSR parchalanishini “XX asrning eng katta geosiyosiy falokati” deb atagan edi.

Mavzuga doir:

• Rossiyaning Ukrainaga qarshi taktik yadro qurolidan foydalanish tahdidi “juda yuqori” — Ukraina razvedkasi
• Putin 30-sentabr kuni yangi hududlarning Rossiyaga qo‘shilishi haqidagi shartnomalarni imzolaydi