Dog‘iston muftiysining rafiqasi va maslahatchisi Ayna Gamzatova Rossiya prezidenti Vladimir Putinga ochiq xat yo‘lladi. Gamzatova Putinning “donoligi va bebaho tajribasi”ga murojaat qilib, Dog‘iston aholisiga safarbarlik va boshqa murojaatlar uchun olti oylik muhlat berishni so‘radi, deya xabar beradi Meduza.
“Men va mening xalqim — Dog‘istonning 3 million aholisidan uch mingdan ortiq dog‘istonliklar allaqachon frontda turganini, ular orasida qahramonlar ham borligini hisobga olib, sizga safarbarlik va boshqa murojaatlar uchun muhlat taklif qilmoqchimiz”, — deydi Ayna Gamzatova.
Uning fikricha, olti oy ichida mintaqa “dog‘istonlik yigitlarni professional tarzda tayyorlash” imkoniyatiga ega bo‘ladi. Uning so‘zlariga ko‘ra, hozirda Dog‘iston urushga mutlaqo tayyor bo‘lmagan, jangovar texnikani bilmaydigan, umuman qurolning hech qanday turini tushunmaydigan yoshlarni yubormoqda”.
Gamzatova, shuningdek, Checheniston rahbari Ramzan Qodirov “ko‘p yillar davomida o‘z respublikasida jangchilarni malakali va sodiq tayyorlagani”ni ham eslatib o‘tdi. Avvalroq Qodirov Chechenistonda safarbarlik amalga oshirilmasligini, chunki respublika “rejani 254 foizga oshirib bajarganini” aytgandi.
E’lon qilingan raqamlarga ko‘ra, Rossiya Federatsiyasi subyektlari soni bo‘yicha Dog‘iston ham Checheniston kabi safarbarlik rejasini to‘la bajargan.
Dog‘iston muftiysining rafiqasi Putin “dono, to‘g‘ri va irodali qaror” qabul qilishiga umid bildirdi va prezidentning har qanday qarori “fuqarolar uchun qonun va vaziyatdan adolatli natija olishning kafolati” ekanini ta’kidladi.
Kreml “RIA Novosti”ga murojaatni hali ko‘rib chiqmaganini ma’lum qildi.
Izoh (0)