Доғистон муфтийсининг рафиқаси Путиндан республика аҳолисини олти ой давомида армияга чақирмасликни илтимос қилди

Доғистон муфтийсининг рафиқаси ва маслаҳатчиси Айна Гамзатова Россия президенти Владимир Путинга очиқ хат йўллади. Гамзатова Путиннинг «донолиги ва бебаҳо тажрибаси»га мурожаат қилиб, Доғистон аҳолисига сафарбарлик ва бошқа мурожаатлар учун олти ойлик муҳлат беришни сўради, дея хабар беради Meduza.

«Мен ва менинг халқим — Доғистоннинг 3 миллион аҳолисидан уч мингдан ортиқ доғистонликлар аллақачон фронтда турганини, улар орасида қаҳрамонлар ҳам борлигини ҳисобга олиб, сизга сафарбарлик ва бошқа мурожаатлар учун муҳлат таклиф қилмоқчимиз», — дейди Айна Гамзатова.

Унинг фикрича, олти ой ичида минтақа «доғистонлик йигитларни профессионал тарзда тайёрлаш» имкониятига эга бўлади. Унинг сўзларига кўра, ҳозирда Доғистон урушга мутлақо тайёр бўлмаган, жанговар техникани билмайдиган, умуман қуролнинг ҳеч қандай турини тушунмайдиган ёшларни юбормоқда».

Гамзатова, шунингдек, Чеченистон раҳбари Рамзан Қодиров «кўп йиллар давомида ўз республикасида жангчиларни малакали ва содиқ тайёрлагани»ни ҳам эслатиб ўтди. Аввалроқ Қодиров Чеченистонда сафарбарлик амалга оширилмаслигини, чунки республика «режани 254 фоизга ошириб бажарганини» айтганди.

Эълон қилинган рақамларга кўра, Россия Федерацияси субъектлари сони бўйича Доғистон ҳам Чеченистон каби сафарбарлик режасини тўла бажарган.

Доғистон муфтийсининг рафиқаси Путин «доно, тўғри ва иродали қарор» қабул қилишига умид билдирди ва президентнинг ҳар қандай қарори «фуқаролар учун қонун ва вазиятдан адолатли натижа олишнинг кафолати» эканини таъкидлади.

Кремль «РИА Новости»га мурожаатни ҳали кўриб чиқмаганини маълум қилди.