Бирлашган Миллатлар Ташкилоти Хавфсизлик Кенгашида нутқ сўзлаган Гаити расмийлари мамлакатда гуманитар фалокат юз бераётгани ҳақида огоҳлантирди, деб ёзади Deutche Welle.
Жаҳон озиқ-овқат дастури маълумотларига кўра, бу ой Гаитида талон-торожлар оқибатида камида 6 миллион долларлик ёрдам, жумладан, 2000 тонна озиқ-овқат йўқолган.
«Иқтисодий инқироз, бандитизм ва сиёсий инқироз гуманитар фалокатга айланиб кетди. Биргина сўнгги икки ҳафта ичида Жаҳон озиқ-овқат дастурига қилинган ҳужумлар оқибатида қарийб 5 миллион доллар баҳосидаги 2 минг тонна озиқ-овқат ёрдами йўқолди. Бу келаси ой давомида 200 мингга яқин энг ночор гаитиликларни қўллаб-қувватлашга етган бўларди», — деди Гаитининг БМТдаги вакили Ҳелен Ла Лайм.
Гаити бош вазири Ariel Генри мамлакатда ёнилғи нархи ошишини эълон қилганидан кейин норозилик ва талон-тарожлар бошланган. Ҳукумат ёнилғи субсидияларини қисқартириш сабабини харажатларнинг ортиши билан изоҳлаган.
Гаитининг энг йирик саноат парки Каракол ҳам ишлашдан тўхтаган. Ташқи ишлар вазири Жан Виктор Женеуснинг айтишича, бу 12 минг иш ўрни йўқолишига сабаб бўлиши мумкин. Унинг сўзларига кўра, хусусий компаниялар мамлакатни тарк этиш билан таҳдид қилмоқда, болаларни мактабга қайтариш имконияти энди сўроқ остида қолмоқда. Аввал Гаити ҳукумати мактабларни 3 октябрдан қайта очишни режалаштирган эди.
Гаити икки ҳафта давом этган зўравонлик ва озиқ-овқат омборларига ҳужумлардан сўнг «ночорликнинг янги даражасига» кўтарилди, дейди маҳаллий расмийлар. Порт-о-Пренсдан чиқиш йўллари бир неча ойдан бери жиноий гуруҳлар томонидан тўсиб қўйилган, бу эса халқаро ташкилотларнинг камбағалларга озиқ-овқат тарқатиш борасидаги саъй-ҳаракатларини секинлаштирмоқда.
Изоҳ (0)