Qirg‘iziston va Tojikiston chegarasidagi mojaro oqibatida 63 nafar qirg‘izistonlik halok bo‘lgan. Bu haqda Qirg‘iziston Favqulodda vaziyatlar vazirligiga tayanib, “Interfaks” xabar berdi.
“Botken viloyatining Botken va Laylak tumanlaridagi qirg‘iz-tojik chegarasida yuz bergan mojarolar vaqtida Qirg‘izistonning 63 nafar fuqarosi o‘qqa tutilish oqibatida halok bo‘ldi”, — deyiladi vazirlik xabarida.
Vazirlik matbuot xizmati ma’lumotlariga ko‘ra, qurbonlarning 50 nafari harbiy xizmatchilar va 13 nafar tinch aholi vakillari, 195 kishi jarohatlangan.
Qirg‘iz—tojik chegarasida qurol qo‘llash bilan bog‘liq mojaro 14-sentabr kuni boshlangan edi. Har ikki tomondan qurbonlar va yaradorlar bo‘ldi. Tomonlar bir-birini qurolli bosqinchilikda aybladi.
Mamlakat rasmiylariga ko‘ra, mojaro hududidan 142 mingdan ortiq fuqaro evakuatsiya qilingan.
Qirg‘iziston Favqulodda vaziyatlar vazirligining ma’lum qilishicha, Botken viloyatida dastlabki ma’lumotlarga ko‘ra, mingga yaqin obyekt, jumladan, 613 ta turar joy binosi vayron bo‘lgan yoki yonib ketgan.
19-sentabr kuni kechqurun Qirg‘iziston va Tojikiston chegaradagi vaziyatni barqarorlashtirish va ikki davlat o‘rtasida tinchlik o‘rnatish to‘g‘risida protokol imzoladi. Biroq 21-sentabr kuni Tojikiston Qirg‘iziston chegarada provokatsiyalarni amalga oshirayotganini ma’lum qildi.
25-sentabr kuni Qirg‘iziston va Tojikiston Milliy xavfsizlik davlat qo‘mitasi rahbarlari “Qizil-bel” nazorat-o‘tkazish punktida uchrashib, chegaradagi vaziyatni tartibga solish bo‘yicha protokol imzoladi.
Izoh (0)