“ Siz chiroyli gapirib, dinimizni chiroyli ko‘rsating. Lekin munozara qilib, birovni haqorat qilmang”. Muftiy musulmonning odobi haqida gapirdi

Muftiy Nuriddin Xoliqnazarov O‘zbekistondagi ahli ilmlarga murojaat qilib, o‘zlarining noo‘rin xati-harakatlari bilan dinni xunuk ko‘rsatib qo‘yayotganlarga tanbeh berdi.

Shuningdek, dinni yetkazishda chiroyli yo‘ldan borish zarurligini ta’kidlab o‘tdi.

“Bu qanaqa tag‘ibot, bu qanaqa munozara, bu qanaqa din tarbiyasi? Bunday qilmaslik kerak.

Aksariyat hollarda, munozarada maqsadga erishish yo‘lida har qanday vositalardan foydalanish mumkin, deb hisoblanmoqda. Natijada yolg‘on gapirish, yolg‘on guvohlik berish, dalillarni noto‘g‘ri ishlatish kabi dinimiz harom qilgan amallarga ham qo‘l uriladi. Unday qilmaslik kerak.

Hidoyat sizning qo‘lingizda emas. Alloh xohlagan bandasiga hidoyat beradi. Agar qo‘llarida bo‘lganida edi, Payg‘ambarimiz sollallohu alayhi vasallam o‘z amakilari Abu Tolibni musulmon qilgan bo‘lardilar. Abu Tolib iymonga kelmadilar.

Alloh Taolo oyati karimada “Siz o‘zingiz sevgan kimsalarni hidoyat qilolmaysiz”, - deyapti. Demak, hidoyat Allohdan ekan.

Siz chiroyli gapirib, dinimizni chiroyli ko‘rsating. Lekin munozara qilib, birovni haqorat qilmang. Siz bilan biz yashayotgan jamiyatda har xil toifadagi har xil kimsalar bor. Bugun u kasbning egasi bilan tortishib, urushsak, ertaga bu kasbning egasi bilan tortishib, urushsak, sen qilayotgan ishing, ko‘rinishing, yurish-turishing shariatga muvofiq emas, deb uni haqorat qilsak, unda musulmon odobi, Payg‘ambarimiz sollallohu alayhi vasallamning husni xulqlari qayerda qoladi?

Biz shunday bo‘laylikki, bizni hamma sevsin. Dinimizda bo‘lgan ham, bo‘lmagan ham. Musulmon bo‘lgan ham, bo‘lmagan ham. Ibodat qilgan ham, ibodat qilmagan ham. To‘g‘ri yo‘lda yurgan ham, hatto, noto‘g‘ri yo‘lda yurgan bo‘lsa ham u bizni sevsin!” – dedi Muftiy.

Shu bilan birga, Nuriddin Xoliqnazarov ba’zi bir yosh ahli ilmlar, domlalar noto‘g‘ri gapirib, kimnidir ko‘nglini ranjitib qo‘ygan bo‘lsa, ularning nomidan uzr so‘radi: “Xodimlarimizning bilmasdan qilgan kamchiliklarini dinning xatosi deb qabul qilmang. Shaxslar xatosi. Shaxslar xatosi esa uzr ila yuviladi. Uzrimizni qabul qilgaysiz. Alloh hammamizni hidoyatda qilsin”.