Ijtimoiy tarmoqlarda Namangan shahridagi 2-sonli kasb-hunar maktabi posbonlari o‘quvchilarni kalta paypoq kiygani uchun ichkariga kiritmagani haqidagi xabarlar tarqaldi. “Daryo” ushbu holatga aniqlik kiritish uchun Namangan viloyat kasbiy ta’limni rivojlantirish va muvofiqlashtirish hududiy boshqarmasi mutasaddilar bilan bog‘landi.
Xabarlarga “Tashqarida 21 asr. Ilon Mask butun dunyoni bepul internet bilan ta’minlash uchun harakatlar olib borayotganda, dunyoning bir chetida baraka topgur ma’naviyatchilar kalta paypoq kabi milliy dushman bilan ovora”, deya izoh qoldirilgan va ushbu posbonlar Milliy gvardiya xodimlari bo‘lishi mumkinligi taxmin qilingan.
Boshqarma axborot xizmatining ma’lum qilishicha, mazkur voqea yuzasidan ishchi guruh tuzilib, holat joyida o‘rganilgan. Ma’lum bo‘lishicha, o‘quvchilar xavfsizligini ta’minlash, kasb-hunar maktabi hududiga begona shaxslar kirishiga yo‘l qo‘ymaslik maqsadida xususiy qo‘riqlash xizmati bilan shartnoma tuzilgan. Shu bois muassasani Milliy gvardiya xodimlari qo‘riqlagani haqidagi taxminlar haqiqatga to‘g‘ri kelmaydi.
“Suratlardagi o‘quvchilarga hech qanday tazyiq o‘tkazilmagani, o‘quvchilar o‘zlari to‘xtab turishgani, qo‘riqlash xizmati xodimi eshik tagida o‘quvchilarni kirishini nazorat qilayotgani aniqlandi. Shuni alohida ta’kidlash joizki, kasb-hunar maktabi rahbariyati tomonidan qo‘riqlash xizmati xodimlariga tegishli tartibda, qonun doirasida faoliyat yuritishlari tushuntirilgan”, — deyiladi boshqarma axborot xizmati xabarida.
Izoh (0)