Муфтий Нуриддин Холиқназаров Ўзбекистондаги аҳли илмларга мурожаат қилиб, ўзларининг ноўрин хати-ҳаракатлари билан динни хунук кўрсатиб қўяётганларга танбеҳ берди.
Шунингдек, динни етказишда чиройли йўлдан бориш зарурлигини таъкидлаб ўтди.
«Бу қанақа тағибот, бу қанақа мунозара, бу қанақа дин тарбияси? Бундай қилмаслик керак.
Аксарият ҳолларда, мунозарада мақсадга эришиш йўлида ҳар қандай воситалардан фойдаланиш мумкин, деб ҳисобланмоқда. Натижада ёлғон гапириш, ёлғон гувоҳлик бериш, далилларни нотўғри ишлатиш каби динимиз ҳаром қилган амалларга ҳам қўл урилади. Ундай қилмаслик керак.
Ҳидоят сизнинг қўлингизда эмас. Аллоҳ хоҳлаган бандасига ҳидоят беради. Агар қўлларида бўлганида эди, Пайғамбаримиз соллаллоҳу алайҳи васаллам ўз амакилари Абу Толибни мусулмон қилган бўлардилар. Абу Толиб иймонга келмадилар.
Аллоҳ Таоло ояти каримада «Сиз ўзингиз севган кимсаларни ҳидоят қилолмайсиз», - деяпти. Демак, ҳидоят Аллоҳдан экан.
Сиз чиройли гапириб, динимизни чиройли кўрсатинг. Лекин мунозара қилиб, бировни ҳақорат қилманг. Сиз билан биз яшаётган жамиятда ҳар хил тоифадаги ҳар хил кимсалар бор. Бугун у касбнинг эгаси билан тортишиб, урушсак, эртага бу касбнинг эгаси билан тортишиб, урушсак, сен қилаётган ишинг, кўринишинг, юриш-туришинг шариатга мувофиқ эмас, деб уни ҳақорат қилсак, унда мусулмон одоби, Пайғамбаримиз соллаллоҳу алайҳи васалламнинг ҳусни хулқлари қаерда қолади?
Биз шундай бўлайликки, бизни ҳамма севсин. Динимизда бўлган ҳам, бўлмаган ҳам. Мусулмон бўлган ҳам, бўлмаган ҳам. Ибодат қилган ҳам, ибодат қилмаган ҳам. Тўғри йўлда юрган ҳам, ҳатто, нотўғри йўлда юрган бўлса ҳам у бизни севсин!» – деди Муфтий.
Шу билан бирга, Нуриддин Холиқназаров баъзи бир ёш аҳли илмлар, домлалар нотўғри гапириб, кимнидир кўнглини ранжитиб қўйган бўлса, уларнинг номидан узр сўради: «Ходимларимизнинг билмасдан қилган камчиликларини диннинг хатоси деб қабул қилманг. Шахслар хатоси. Шахслар хатоси эса узр ила ювилади. Узримизни қабул қилгайсиз. Аллоҳ ҳаммамизни ҳидоятда қилсин».
Изоҳ (0)