O‘zbekistonga Pokistondan ming dollardan kayla dumba zotli qo‘ylar olib kelindi. Bu haqda 25-sentabr kuni Veterinariya va chorvachilikni rivojlantirish davlat qo‘mitasi tomonidan o‘tkazilgan “Naslli qo‘chqorlar ko‘rgazmasi”da ma’lum qilindi.
Tadbirkor Ozod Ubaydullayevning aytishicha, Pokistondan kayla dumba zotli qo‘ylar O‘zbekistonga shu naslni ko‘paytirish maqsadida olib kelingan.
“Olib kelishimiz sal qiyinroq bo‘ldi. 15 bosh qo‘yni Pokistondan Afg‘onistonga, u yerdan Qirg‘izistonga va keyin O‘zbekistonga olib keldik. Bizga kirib kelish narxi 1000 dollar atrofida to‘g‘ri keldi.
Hozircha ko‘rgazma yo‘nalishda ishlayapmiz. Har xil hisori va afg‘on zoti bilan chatishtirib, ko‘paytirmoqchimiz. Afg‘on zotli qo‘y bilan chatishtirib ko‘rdik, natija yomon emas”, – dedi Ozod Ubaydullayev.
Uning qo‘shimcha qilishicha, 4-5 oylik qo‘zichoqlarning tirik vazni 45-50 kilo atrofida, to‘rt tishli katta qo‘chqorlarning bo‘yi bir metrdan balandroq.
Qo‘mita tomonidan berilgan ma’lumotlarga ko‘ra, qo‘ylarning Merinos, Romanov, Edilboy, Dorper zotlari hamda echkilarning Angor, Mursiano va Zanen zotlari chet davlatlardan keltirilib ko‘paytirilmoqda.
Ma’lumot uchun: import qilingan bir bosh naslli qo‘y-echkilarga 400 ming so‘m, 1 kg qoramol va qo‘y go‘shti uchun 4 ming so‘m subsidiya ajratilishi belgilangan.
Izoh (0)