O‘zbekiston va Niderlandiya to‘qimachilik kompaniyalari o‘rtasida hamkorlik kengaytiriladi
O‘zbekiston elchisi Dilyor Hakimov Niderlandiyada “Grosso Moda” kompaniyasining ishlab chiqarish bo‘yicha direktori Lars Alblasos va “Grosso Moda Uzbekistan”ning operatsion direktori Natalya Doll bilan uchrashdi, deb xabar bermoqda “Dunyo” axborot agentligi.
Qayd etilishicha, “Grosso Moda” yiliga 2,5 million dona kiyim-kechak ishlab chiqaradigan dizayn kompaniyasi hisoblanadi. Kompaniya o‘z faoliyatini 1992-yilda moda mahsulotlari va to‘qimachilik xizmatlarini yetkazib beruvchisi sifatida boshlagan. Bugungi kunda u brendlar uchun moda dizayn konsepsiyalarini, shuningdek, ularni ishlab chiqarish va chakana savdo do‘konlari hamda moda tarmoqlariga yetkazib berish bilan shug‘ullunadi.
Uchrashuvda O‘zbekistonda tadbirkorlik faoliyatini boshlash uchun muhim yo‘nalishlar, xususan, “Grosso Moda”dan o‘zbekistonlik hamkorlarga buyurtmalar ko‘payishi natijasida ishlab chiqarish quvvatlarini baholash, buyurtmalarni joylashtirish uchun eng mos pudratchini tanlash, eksport hajmini oshirish, Niderlandiyadagi kompaniyada amaliyot o‘tash imkoniyati bilan ixtisoslashgan talabalar uchun ta’lim dasturlarini tashkil etish, Yevropaga tayyor mahsulotlarni yetkazib berish, zavodlarni rivojlantirish singari qator masalalar muhokama qilingan.
Niderlandiya kompaniyasi va o‘zbekistonlik sheriklar o‘rtasida hamkorlikni kengaytirish bo‘yicha kelishuvga erishilgan.
