“Hozir Rossiyadan zudlik bilan ketish kerak bo‘lgan vaziyat yo‘q” – yurist migrantlar harbiy safarbarlikka majburan jalb etilmayotgani haqida

Rossiya fuqaroligi bo‘lmagan shaxslar harbiy safarbarlikka majburan jalb etilmaydi. Bu haqda yurist Zarnigor Omonillayeva Telegram’dagi kanalida post qoldirdi.

Zarnigor Omonillayevaning yozishicha, Rossiya qonunchiligida chet el fuqarolari harbiy holat bo‘yicha hech qanday majburiy akt ishtirokchilari emasligi ko‘rsatilgan.

Agar migrantlarni majburan urushga yuborish maqsadlari bo‘lganida qonunchilikka bu haqida o‘zgartirish kiritishar edi. Ko‘rdingiz, qonunchilikni o‘zgartirishmoqchi bo‘lsa, ularga bu uchun 4 soat vaqt yetib, ortyapti.

Lekin haligacha mobilizatsiya va harbiy holat bo‘yicha qonunchilikda chet el fuqarolari hech qanday majburiy akt ishtirokchilari emas. Hozirda amal qilib turgan qonunchilikka ko‘ra, faqat Rossiya fuqaroligi borlar majburlanadi. Rossiya fuqaroligi yo‘qlar uchun majburlash va harbiy xatar yo‘q.

Chegara yopilishidan qo‘rqayotgan bo‘lsangiz — karantinda chegaralar hamma uchun yopiqligida ham Rossiyadan chiqib ketishga taqiq bo‘lmaganini eslang. Rossiya fuqarolariyam, migrantlar ham Rossiyadan bemalol chiqib keta olgan.

Chiqib ketishga taqiq bo‘lmaganidan keyin xohlagan vaqtingiz ketaverasiz. Hozir hamma narsani tashlab, tayyorgarliksiz ketib, uyda oilangiz bilan birga och qolishingiz shart emas.

Mabodo, favqulodda qandaydir holat bo‘lib qolsa, karantindagidek charter reyslar va boshqa evakuatsiya choralari ko‘riladi. Xavotir olmang.

Zarnigor Omonillayeva, huquqshunos

“Harbiylikka bo‘lgan targ‘ibotga aldanib, yollanib ketib qolmaslik talab qilinadi. Hujjatlarni to‘g‘irlab, noqonuniy migrantga aylanib qolmaslik so‘raladi. Chunki tekshiruv ko‘p.

Sizga nisbatan biror nojo‘ya harakat bo‘lsa, zudlik bilan elchixona, huquq faollari yoki jurnalist va blogerlarga murojaat qilish tavsiya etiladi.

Ishingiz tayin, harbiylikka hech kim hech narsa deb sizni chaqira olmasligiga 100 foiz ishonchingiz komil bo‘lsa, hozircha Rossiyada ishlayvering. Aldanib qolaman yoki O‘zbekistonda ham ishlarim yaxshi, bu yerda yurishim shart emas, desangiz unda albatta, ketganingiz yaxshi. O‘zingizni ham, yaqinlaringizni ham xavotirga qo‘ymaysiz.

Tushunganingizdek, hozir zudlik bilan ketish kerak bo‘lgan vaziyat yo‘q. Agar qolayotgan bo‘lsangiz, iltimos, yaqinlaringiz bilan har kuni aloqada bo‘lib turing. Ularni xavotirga qo‘ymang. Yaxshiligingizni bilib, tinch o‘tirishsin. Sizdan xavotir olib, biror kasallik orttirishsa, yaxshi ish bo‘lmaydi”, – deb yozgan yurist.

Avvalroq harbiy safarbarlik boshlanganidan beri Rossiyani 261 ming nafar erkak tark etgani xabar qilingandi.