Ўзбекистон элчиси Дилёр Ҳакимов Нидерландияда «Grosso Moda» компаниясининг ишлаб чиқариш бўйича директори Ларс Албласос ва «Grosso Moda Uzbekistan»нинг операцион директори Наталя Долл билан учрашди, деб хабар бермоқда «Дунё» ахборот агентлиги.
Қайд этилишича, «Grosso Moda» йилига 2,5 миллион дона кийим-кечак ишлаб чиқарадиган дизайн компанияси ҳисобланади. Компания ўз фаолиятини 1992 йилда мода маҳсулотлари ва тўқимачилик хизматларини етказиб берувчиси сифатида бошлаган. Бугунги кунда у брендлар учун мода дизайн концепцияларини, шунингдек, уларни ишлаб чиқариш ва чакана савдо дўконлари ҳамда мода тармоқларига етказиб бериш билан шуғуллунади.
Учрашувда Ўзбекистонда тадбиркорлик фаолиятини бошлаш учун муҳим йўналишлар, хусусан, «Grosso Moda»дан ўзбекистонлик ҳамкорларга буюртмалар кўпайиши натижасида ишлаб чиқариш қувватларини баҳолаш, буюртмаларни жойлаштириш учун энг мос пудратчини танлаш, экспорт ҳажмини ошириш, Нидерландиядаги компанияда амалиёт ўташ имконияти билан ихтисослашган талабалар учун таълим дастурларини ташкил этиш, Европага тайёр маҳсулотларни етказиб бериш, заводларни ривожлантириш сингари қатор масалалар муҳокама қилинган.
Нидерландия компанияси ва ўзбекистонлик шериклар ўртасида ҳамкорликни кенгайтириш бўйича келишувга эришилган.
Изоҳ (0)