O‘zbekistonda kichik biznes uchun eksport va xalqaro savdoni o‘qitish dasturi yo‘lga qo‘yilmoqda. 22-sentabr kuni Toshkent davlat iqtisodiyot universitetida ushbu dastur taqdimoti bo‘lib o‘tdi, deb xabar bermoqda “Daryo” muxbiri.
Ma’lum bo‘lishicha, dastur orqali tadbirkorlar xalqaro savdo qoidalari, eksport tartib-qoidalari, tranzit yo‘llari, sifat va muvofiqlik standartlari, shuningdek, Yevropa Ittifoqi bozorining o‘ziga xos talablari bilan tanishib, malaka oshirishlari mumkin.
Trening dasturini Jahon Savdo Tashkiloti va Birlashgan Millatlar Tashkilotining qo‘shma agentligi bo‘lgan Xalqaro savdo markazi ishlab chiqqan. Dastur O‘zbekiston va Markaziy Osiyoning boshqa mamlakatlaridagi eksportchilarning o‘ziga xos muammolariga qaratilgan.
Ushbu kurs orqali tadbirkorlar xalqaro bozorga chiqish qiyin emasligini tushunadi. To‘rtta modulda trenerlar qanday hujjatlar talab etilishi, jarayonlar haqida o‘rgatadi. Buning uchun trenerlar bir yil davomida o‘qitildi. Asosiy vazifa — viloyatlarda ham yosh tadbirkorlarda eksport bo‘yicha kerakli ko‘nikmalarni hosil qilish, — deydi Iqtisod fanlari nomzodi, dotsent Nilufar Ismoilova.O‘quv dasturi kichik biznes va xususiy tadbirkorlik subyektlariga amaliy mashg‘ulotlar va hayotiy misollar orqali o‘z mahsulotlarini mintaqaviy va xalqaro miqyosda eksport qilishga yaxshiroq tayyorgarlik ko‘rishda yordam berishi kutilmoqda.
Qayd etilishicha, o‘quv dasturi Toshkent davlat iqtisodiyot universiteti tomonidan onlayn va oflayn shaklda amalga oshiriladi.
Izoh (0)